Memleket basshysy Qasym-Jomart Toqaev «Sheteldik týrıser sany 9 mln.-ǵa deıin ósýi tıis» degen bolatyn. Qazaqstannyń bul baǵytta múmkindigi zor ekeni anyq.
Tabıǵatymyz týrızmdi damytýǵa óte qolaıly meken. Elimiz qońyrjaı kontınentti beldeýde ornalasqan. Soltústikte qys uzaqtaý. Al ońtústikte jaz mezgili sozylyńqy keledi. Jer bederinde de aıyrmashylyqtar baıqalady. Batys, soltústik jazyq dala, usaq shoqyly bolsa, ońtústik jáne shyǵys óńir taýly qyratty. Ásirese, Almatynyń ornalasqan jeri jasyl-jelekti, Alataýdyń bókteri tabıǵat bergen sulýlyqqa toly.
Tabys kilti
Álemde týrızm salasyn tabys kiltine aınaldyrǵandar jetedi. Sol arqyly ózderiniń tabysyn arttyryp, memlekettik búdjetke qomaqty qarajatpen úles qosýda. Solardyń biregeıleri – Túrkıa, Arab Ámirlikteri, Kanada, Shvesarıa, Malaızıa, t.b. Atalǵan elderge saıahttaýshylar, qajylyq jasaýshylar, zıarat etýshiler, taǵy da basqalaı maqsatpen baratyndar kóp. Ár kelgen kisiden qyrýar qarjy taýyp otyr. Sonymen birge servısti jolǵa qoıǵan. Sapaly túrde qyzmet kórsetedi, qonaq úı, aptalyq baǵdarlamalar, túrli kóńil kóterý sharalaryn uıymdastyrady. Osylaısha qarajattyń qaı baǵyttan quıylatynyn ábden meńgergen.
Saıahattaýǵa qolaıly meken
Qazaq jeriniń asty men ústi óte baı. Myń da bir shúkir. Sonyń ishinde, álginde joǵaryda keltirgendeı, tabıǵatymyz asa kórikti sanalady. Kóz tartar ǵajaıyp ólkeler barshylyq. Qyzǵaldaq pen aport almasynyń otanymyz. Ulttyq qundylyqtar men jádigerlerge baımyz. Sonyń ishinde Ulytaý, Saraıshyq, Saýran, Otyrar syndy qalalardyń orny kúni búginge deıin saıahattaýshylar nazarynan tys qalǵan emes. Al qasıetti Túrkistannyń jóni bir bólek. Naǵyz tarıhı ólke. Áziret Sultan, Rabıǵa Sultanbegim keseneleri, qylýet, ortaǵasyrlyq monsha - bári-bári kóne shejireden syr shertedi. Shyǵys Qazaqstandaǵy Qatonqaraǵaı alqaby, Qaıyńdy, Kólsaı men batystaǵy Beket ata meshitiniń orny bir bólek. Eń bastysy, atalǵan aımaqtarda ınfroqurylymdy rettep, qonaq úılerdi kóptep salyp, jarnamasyn áleýmettik jeliler arqyly jasasaq, nur ústine nur bolmaq.
P.S. Elimizde týrızmdi damytýǵa qatysty qolǵa alynyp jatqan ıgi ister barshylyq. Sonyń biri - kıeli Túrkistan jandanyp, jańaryp keledi. Kóksheniń sulýlyǵyna ne jetsin?! Shirkin, ǵajap qoı! Eń negizgi aıtarymyz, Qazaqstan damyǵan, áleýetti elder sanatyna qosyla bersin! Ekonomıkamyz qaryshtap damı bersin!