Elordada Qazaqstan Respýblıkasynyń Týrızm jáne sport mınıstri Erbol Myrzabosynovtyń tóraǵalyǵymen keńeıtilgen aparattyq keńes ótti, dep habarlaıdy aqshamnews.kz
Jıynǵa mınıstrliktiń vedimistik baǵynysty uıymdarynyń, óńirlik dene shynyqtyrý jáne sport basqarmalarynyń basshylary men ókilderi qatysyp, 2024 jyldy qorytyndylady. Keńeste óńirlik sport basqarmalarynyń basshylary men ókilderi óz oblysyndaǵy sport ınfraqurylymy, dene shynyqtyrý men sportty damytý, sondaı-aq jastardy sportqa baýlý máseleleri boıynsha esep berdi. Sonymen qatar oblystardaǵy sporttyń jaı-kúıi, qordalanǵan máseleleri ashyq talqyǵa salynyp, sheshý joldary usynyldy.
Mınıstr sporttyń qoǵamdaǵy mańyzy men dene shynyqtyrýmen aınalysýdyń adam densaýlyǵy men ómir sapasyna áserin atap ótti. Sonymen qatar ol sport salasynyń damýynda kezdesetin kedergilerdi sheshýge baǵyttalǵan naqty sharalardy ashyq talqylaýdyń qajettigin jetkizdi. Jıynda sport ınfraqurylymyn damytý, ásirese aýyldyq jerlerdegi sport alańdarynyń sanyn kóbeıtý, Memlekettik-jekeshelik áriptestik tetigin qoldana otyryp jańa sport nysandaryn salý máseleleri kóterildi. Budan basqa, sport salasyndaǵy kadrlardy daıarlaý men olardyń biliktiligin arttyrý, sportshylardy qoldaý sharalaryn kúsheıtý týraly da usynystar aıtyldy.
Erbol Myrzabosynov óńirlerdegi sporttyń jaı-kúıin jan-jaqty talqylap, aımaq sportyn damytýǵa qatysty naqty qadamdardy aıtty. Mınıstr aldaǵy ýaqytta sport salasyndaǵy jetistikterdi arttyrý úshin memlekettik baǵdarlamalardy iske asyrý, óńirlik basqarmalardyń jumysyn úılestirý jáne jergilikti deńgeıde sporttyq is-sharalardy kóbeıtý qajettigin de atap ótti.