Túrik telearnasy «Tomırıs» fılminiń sújeti boıynsha serıal túsirmek
Qazaqstan men Túrkıa rejıser Aqan Sataevtyń «Tomırıs» fılminiń sújeti boıynsha birlesken tarıhı serıal túsirýge nıet bildirip otyr, dep habarlaıdy Almaty-akshamy.kz
Bul týraly Mádenıet jáne sport mınıstri Aqtoty Raıymqulovanyń jaqynda Ystanbulda ótken Korkut Ata Turkic World Film Festival aıasynda túrik arnasy ókilderimen kezdesýinen keıin belgili boldy. Kezdesýge «Qazaqfılm» kınostýdıasynyń basshylyǵy - prezıdent Aqan Sataev pen vıse-prezıdent Aıdar Batalov qatysty.
«Qorqyt ata» festıvaliniń shymyldyǵyn saltanatty túrde ashqan «Tomırıs» fılmi túrik jurtshylyǵyna jaqsy tanys ekenin aıta ketý kerek. Qyrkúıekte masaget patshaıymy týraly fılm Túrkıa kınoteatrlarynda kórsetilip, kórermenderdiń qyzyǵýshylyǵyn týǵyzǵan. Fılm Túrkıanyń 200-den asa kınoteatrlarynda kórsetildi.
Sonymen qatar, festıvál aıasynda túrki álemi elderiniń kınematografıa salasyndaǵy yntymaqtastyǵyn damytýǵa jańa serpin beretin mańyzdy qujatqa qol qoıyldy. Kelisimge Mádenıet jáne sport mınıstri Aqtoty Raıymqulova, Ázerbaıjan Respýblıkasynyń Mádenıet mınıstri Anar Kerimov, Mádenıet, aqparat, sport jáne jastar saıasaty mınıstri Azamat Jamanqulov, «Ózbekkıno» ulttyq agenttiginiń bas dırektory Fırdavs Abdýhalıkov jáne Túrkıanyń mádenıet jáne týrızm mınıstri Mehmet Ersoı qol qoıdy.
Qujat aıasynda taraptar túrki álemi kınoındýstrıasyna qoldaý kórsetetin birlesken qor qurýǵa kelisti.
Sondaı-aq, festıvál aıasynda Aqtoty Raıymqulova «Qazaqfılm» kınostýdıasynyń basshylyǵymen birge belgili túrik kınematografısterimen jáne festıvál qatysýshylarymen kezdesip, birlesken kınojobalardy júzege asyrý máselelerin talqylady.
Eske salaıyq, bıyl Túrkıanyń mádenıet jáne týrızm mınıstrligi alǵash ret uıymdastyrǵan Korkut Ata Turkic World Film Festival-de 13 elden 42 kınokartına kórsetildi. Baıqaý baǵdarlamasynda «Qazaqfılmniń» kelesi fılmderi kórsetildi: rejıser Rústem Ábdirashovtyń «Qazaq handyǵy. Altyn taq» derekti fılmi, rejıser Baqyt Qaıyrbekovtyń «Ogon, mersaıýshıı v sosýde» derekti fılmi, rejıser Adaı Ábeldınovtyń «Kúltegin» tolyq metrajdy anımasıalyq fılmi, rejıser Satybaldy Narymbetovtyń «Amanat» kınotaspasy jáne t.b. bar.
Festıváldiń saltanatty jabylý rásimi kezinde "Qazaqfılm" kınostýdıasy túrki álemi kınematografıasyna qosqan úlesi úshin arnaıy syılyqpen marapattaldy. Belgili túrik aktrısasy Fahrıe Evdjen kınostýdıa prezıdenti Aqan Sataevqa Respect Award músinshesin tabystady.