Túrkıanyń Antalıa qalasyndaǵy Akdeniz ýnıversıtetinde qazaqtyń uly aqyny Tańjaryq Joldyulynyń 120 jyldyq mereıtoıyna oraı Halyqaralyq ádebı konferensıa ótti.
Sharany uıymdastyrýǵa Halyqaralyq «Tańjaryq-zertteý qory» qoǵamy, Dúnıejúzi qazaqtarynyń damý qory, Akdeniz ýnıversıteti, Eýrazıa Jazýshylar Odaǵy jáne «Túrik Oshaǵy» birlestigi atsalysty, dep habarlaıdy Almaty-akshamy.kz QazAqparatqa silteme jasap.
Konferensıanyń basty maqsaty - Tańjaryq Joldyulynyń ómirderegi men shyǵarmashylyǵyn nasıhattaý, Túrik álemine tanystyrý, Qazaq-túrik ádebı, mádenı baılanysyn nyǵaıtýǵa úles qosý.
Shara barysynda túrik tiline aýdarylǵan 22 qazaq aqynynyń óleńderi men ómirbaıany toptastyrylǵan jınaqtyń tusaýy kesildi (toptastyrǵan M. Mamythan). «Tańjaryq» jýrnaly tanystyryldy, Qazaqstannan barǵan aqyndar óleńderin oqydy, Tańjaryq shyǵarmalaryna taldaý jasaldy, óner adamdary Tańjaryqtyń ánderin shyrqady.
Túrkıadaǵy belgili jazýshy, ǵalym, qoǵam qaıratkerleri Tańjaryq aqynnyń qıyn da qıly ómirine toqtalyp, shyǵarmalary, artynda qalǵan baı muralaryna taldaý jasaı otyryp, «Tańjaryq Joldyuly - túrki áleminiń ortaq qundylyǵy» degen baǵasyn berdi.
Tańjaryq Joldyuly – aqyn, 1903 jyly naýryzdyń 15 juldyzynda Shynjań İle Qazaq avtonomıaly oblysyna qarasty Kúnes aýdanyndaǵy Qamysty degen aýylda dúnıege kelgen. Alǵashqy bilim jolyn týǵan aýlynda bastaǵan, 1922-1925 jyldary Qazaqstanda Kegen, Narynqol aýdandarynda jetijyldyq mektepte oqyǵan. Qazaq jazýshylarynyń eńbekterimen keńinen tanys bolǵan. Ózi de óleń jazyp, aıtysqa qatysqan.
Tańjaryq Joldyuly Shyńjańda muǵalim bolyp qyzmet atqarǵan, «İle» gazetinde redaktorlyq qyzmet istedi. Keıinnen 1940-1946 jyldary Qytaıdaǵy solaqaı saıasattyń kesirinen tutqyndalyp, túrmege jabylǵan. Onyń «Jastaryma», «Osy tań kimniń tańy?», «Oqyp kór gazetimdi», «Kóńilim qaldy, toryqty», «Abaqtyda kim jatyr?», «Aqyn syry», «Elime» óleńderi osy kezde jazylǵan. «Ótken kúnderim» (1942), «Qoshtasý» (1941 - 1942), «Qasqyr men Bóribasar» (1934 - 1943), t.b. tolǵaý jyrlary men «Nazıgúl» (1943) dastanynyń avtory. «Alǵashky jınaq» (Qulja, 1948), «Armantaý» (1974) jınaqtary jaryq kórgen. 1947 jyly aqyn ómirden ozdy.