Eksport kólemi 3%-ǵa ósken.
Bir aıda bıdaı men meslınniń eksporttyq baǵasy 10%-ǵa jáne bir jylda 32%-ǵa ósti. Eksporttyń ózi zattaı mánde 3%-ǵa jáne qundyq mánde birden 40%-ǵa ósti, dep habarlaıdy Almaty-akshamy.kz Energyprom.kz silteme jasap.
Bıylǵy qańtar-shilde aılarynyń qorytyndysy boıynsha Qazaqstannan eksportqa 1 mlrd AQSH dollaryna 3,3 mln tonna bıdaı men meslın jiberildi. Zattaı kóriniste ósim 3,2%-dy, al aqshalaı kóriniste 40,4%-dy qurady.
TMD elderine 2,3 mln tonna ónim jóneltildi, bul bir jyl burynǵyǵa qaraǵanda 3%-ǵa artyq. Eń kóp kólem Ózbekstan (1,5 mln tonna), Tájikstan (416 myń tonna) jáne Túrkimenstanǵa (217,9 myń tonna) eksporttaldy.
TMD quramyna kirmeıtin ózge elderge 1 mln tonna bıdaı jóneltildi, bul ótken jylmen salystyrǵanda 3,6%-ǵa artyq. Máselen, Iranǵa 458,9 myń tonna ónim jiberildi, mundaǵy jyldyq ósim 34,2%-dy qurady. Top-3 eldiń qataryna Aýǵanstan (267,3 myń tonna) jáne Italıa (151,2 myń tonna) da kirdi.
2022 jylǵy shildeniń qorytyndysy boıynsha bıdaı men meslınge eksporttyq jetkizilimderdiń baǵasy bir aıda 10,1%-ǵa, jyl basynan bastap 14,5%-ǵa jáne bir jylda 32,1%-ǵa ósti.
Onyń ishinde TMD elderi úshin aılyq dınamıkadaǵy baǵalar 11%-ǵa, qalǵan elder úshin 8,4%-ǵa ósti. Jyldyq dınamıkada TMD elderi úshin baǵanyń ósýi 35,4%-dy, qalǵan elder úshin 23%-dy qurady.
Ústimizdegi jyly bıdaıǵa arnalǵan egis alańy 12,9 mln gektardy qurady, bul bir jyl burynǵyǵa qaraǵanda 0,2%-ǵa artyq.
Qazaqstanda astyq jınaý naýqany qyzý júrip jatyr, astyq arzandap barady, dep habarlaıdy Habar24. Shildede 180 myń teńge shamasynda bolǵan bıdaıdyń tonnasy bazarda 130-135 myń teńgeden satylýda.