Jyljymaıtyn múlki bola tura, turǵyn úı kezegine tirkelgender bar – Otbasy bank
Turǵyn úı kezegine turǵan keıbir qazaqstandyqtardyń jyljymaıtyn múlki bar bolyp shyqty. Bul týraly «Otbasy bank» AQ basqarma tóraǵasy Lázzat Ibragımova málim etti, dep habarlaıdy Almaty-akshamy.kz.
«Turǵyn úı kezeginde turǵan 46 azamattyń ótinimi keri qaıtaryldy. Sebebi olardyń jyljymaıtyn múlki bar. Al ereje boıynsha turǵyn úı kezeginde turǵan azamat atynda jyljymaıtyn múlik bolmaýy tıis. Demek, jergilikti ákimdik turǵyn úı kezeginde turǵan azamattardy teksermeı, úı kezegine qoıa beredi degen sóz», - dedi Lázzat Ibragımova Ortalyq komýnıkasıalar qyzmeti alańynda ótken baspasóz máslıhatynda.
Bank basshysynyń aıtýynsha, keıbir ákimdikter turǵyn úı kezeginde turǵandarǵa monıtorıń júrgizbeıdi.
«Sonymen qatar 52 klıenttiń salyq boıynsha qaryzy bolǵan. Sol sıaqty 46 klıenke tólem mindeti júktelgen. Bul degenimiz atalǵan azamattardyń basqa bank aldynda qaryzy bar degen sóz. Olar basqa bank esepshotyndaǵy qarjysyn meńgere almaıdy. Biz qazir bul máseleni sheshýdiń zańdy jolyn qarap jatyrmyz. Indýstrıa jáne ınfraqurylymdyq damý mınıstrligi tıisti zańnamanyń jobasy ázirlendi. Ol qazir Májilistiń qaraýynda jatyr. Bul - Qazaqstanda alǵash qolǵa alynyp otyrǵan joba. Iaǵnı memleketten sýbsıdıa alý úshin arnaıy esepshottyń bolýy. Ol esepshotqa túsken qarjyny basqa bank bizge qaryz dep sheship almaýy tıis. Eger ol azamattyń salyq boıynsha qaryzy bolsa da, memleket berip turǵan basqa múmkindikti paıdalanýǵa quqyǵy bar», - deıdi ol.