Qazaqstandyq «Turan» etno-folklorlyq ansambliniń álemdik týrnesi bastaldy.
Vashıngtonda konsert bergen «Turan» AQSH-taǵy qazaqtardy rýhtandyryp, amerıkalyq kórermendi tamsandyrdy, dep habarlaıdy Almaty-akshamy.kz 24.kz-ke cilteme jasap.
Ulttyq ónerdi ulyqtap júrgen toptyń qurylǵanyna bıyl on bes jyl toldy. Órleý men quldyraý, azattyq úshin kúres, erlik pen eldik. Bul saqtar men ǵundar zamanynan tartyp alash tarıhyn sazdy aspaptar arqyly sóıletken ózgeshe kesh boldy. Kórermen birde rýhtanyp, shabyttansa, birde zulmat jyldarǵa tap bolyp, kózine erkisiz jas aldy.
«Men tańdana tyńdadym. Tarıh anımasıalar arqyly sóılep jatty. Sózdi túsinbesem de áýen arqyly árbir sátti sińirdim. Men ýkraına qyzymyn. Sondyqtan qazaq halqynyń basynan ótken zulmattardy, onyń ishinde asharshylyqqa qatysty oqıǵalar kózime eriksiz jas keltirdi», - deıdi kórermen Anna Konstenko.
Al Qara jorǵanyń maıda júrisin elestetetin áýen yrǵaǵy shet eldikterdi tamsandyrdy. Tipti kórermen yqylasy aıryqsha bolǵany sondaı, birneshe ret oryndaryn turyp uzaq qol soqty. Turan ulttyq jáne túrki tildes jurttyń otyzǵa jýyq aspabyn jetik meńgergen. Naǵyz besaspab dep top múshelerine aıtýǵa bolady. Ásirese kómeımen án aıtý Vashıngton kórermenderine erekshe áser syılady.