Qazaqstandyqtyń bes jarym jyl ýaqyty zaıa ketti.
Fransıada 20 jylǵa bas bostandyǵynan aıyrylǵan qazaqstandyq Sofıa Bodnarchýk kinásiz dep tanyldy, dep habarlaıdy Almaty-akshamy.kz 24.kz-ke silteme jasap.
Osydan 11 jyl buryn qaraǵandylyq Sofıa Bodnarchýk Fransıaǵa attanyp, sol eldiń azamatyna turmysqa shyqqan. Degenmen 2016 jyly onyń jubaıy Sofıa men eki jasar qyzynyń kózinshe óz ata-anasyn atyp óltirdi.
Oqıǵadan keıin qazaqstandyq bes jarym jylǵa jýyq ýaqytyn fransýz túrmesinde ótkizdi. Oǵan bul iste sybaılas boldy degen aıyp taǵyldy. Sot prosesinde kúıeýiniń týystary jaldaǵan 6 advokat Sofıa Bodnarchýkke qarsy sóz sóıledi.
Bul aralyqta Sofıaǵa otandastary qoldaý bildirdi. Keıin bul iske bilgili zańger Edýard Marsıal kiristi.
«Men jalǵyz qaldym. Ne fransýz tilin, ne zań bilmeımin. Degenmen meni elshilik ókilderi qoldady. Burynǵy elshi Jan Ǵalıev pen zań keńesshisi Rústem Ómirzaqovqa alǵysymdy bildiremin. Osy jyldar ishinde olar maǵan qoldaý kórsetti, sot prosesterinde boldy», - dedi Sofıa Bodnarchýk.
Advokat Edýard Marsıaldiń aıtýynsha, ádiletsiz úkimniń basty sebebi – ózgelerdiń nemquraıdylyǵy.
«Ony árqashan sybaılas retinde qarastyrdy. Onyń aıǵaqtaryna senimsizdik tanytty. Saldarynan sotta Sofıaǵa baı fransýzdyń múlkin ıemdenbek bolǵan dep kúmán keltirildi. Ol sot úkimimen 20 jylǵa bas bostandyǵynan aıyryldy. Bul men úshin kútpegen sheshim boldy. Men qaı jerde, qandaı aǵattyq jibergenimdi túsinbedim», - dedi advokat Edýard Marsıal.
Alaıda, sońynda is Sofıa Bodnarchýktyń paıdasyna sheshildi. Endi Fransıa tarapy ádiletsiz úkimnen keltirilgen zalaldy óteýi tıis. Óziniń kinásizdigin dáleldegen qazaqstandyq endi ata-ana quqyǵyn qaıtarýǵa nıetti.