Pavlodar oblysynyń polıseıleri jeke kásipkerden 1911 alkogól ónimin tárkiledi, – dep habarlaıdy Polisia.kz.
Osy jyly Aqsý qalasyndaǵy dúkenderdiń birinde zańmen tyıym salynǵan ýaqytta alkogól satyldy.
Ýchaskelik polısıa ınspektory alkogólge qarsy zańnamany buzǵany úshin kásipkerge birneshe ret hattama toltyryp, is sotta qaralǵan. Sot qaýlysymen jeke kásipkerge jalpy somasy 193200 teńge aıyppul salynyp, lısenzıa qoldanylýy 2 aı merzimge toqtatylǵan.
Lısenzıanyń joǵyna qaramastan, kásipker alkogóldi satýdy jalǵastyrǵan. Bul rette kásipker zańsyz qyzmetke jol berdi, óıtkeni alkogól ónimin saqtaý jáne ótkizý quqyǵyna lısenzıa bolmaǵan.
– Polısıa jeke kásipkerden túrli 1911 bótelke alkogól ónimin tárkiledi. JK- ge qatysty kásipkerlik qyzmetpen aınalysqany, sondaı-aq tıisti ruqsatsyz is-qımyldardy júzege asyrǵany úshin QR ÁQBtK-niń 463-baby 1-bóligi boıynsha ákimshilik is qozǵaldy, materıal qaraý úshin sotqa jiberildi, – deıdi Pavlodar oblysy Aqsý qalasynyń polısıa bóliminiń bastyǵy Dýlat Tókenov.
Polısıa bul baptyń sanksıasy – shaǵyn kásipkerlik sýbektisine ákimshilik quqyq buzýshylyq zattary tárkilene otyryp, jıyrma bes AEK mólsherinde aıyppul salýdy kózdeıtinin, al lısenzıasyz kásipkerlik qyzmetpen aınalysý – ákimshilik quqyq buzýshylyq saldarynan alynǵan tabysty qosymsha tárkileýge ákep soqtyratynyn eske saldy.