Abaı - qazaqtyń jol bastaýshy shamshyraǵy.
Búgin - uly aqynnyń týǵan kúni. Osyǵan baılanysty túngi Almatynyń ásem oryndaryn túsirýdi Abaı eskertkishine arnadym. Qazaq halqynyń oıshyly, jazba ádebıetimizdiń negizin salýshynyń esimimen atalatyn alańǵa bardym. Alǵashqy fotosýretti sol mańnan bastadym. Túngi Almatyda jarq-jurq etken shamdar bári ǵajaıyp úılesim tapqan. Kórseń, kóz toıady. Sondaı keremet, sondaı ásem.
Ádeıi Abaı dańǵylymen júrdim. Astymda velosıped. Ásirese, túngi kezde shahardy aralasańyz, erekshe sezimge bólenesiz. Kisi qarasy kóp. Ata-analar balalarymen birge serýen qurýda. Bir sát qarbalas tirlikten boı jazyp, arasynda qalany jaıaý aralaǵanǵa ne jetsin. Salqyn samal, keýdeni kergen taza aýa bári-bári áserli kóńil-kúı syılap jandy rahat sezimge bóleıdi. Negizi kóbimiz, ózimiz ǵumyr keship jatqan qalamyzdyń kórikti jerlerine onsha zeıin qoıa bermeımiz. Sondyqtan bolar, syrttan qonaq bolyp kelgender, saıahattaýshylar úshin Almaty ǵajaıyp bolyp kórinedi. Olarmen tolyqtaı kelisemin.
Abaı atamyzdyń muralaryn bala kezimizden oqyp, óleńderin jattap óstik. Árbir aıtqan fılosofıalyq oılary búgingi zamanmen úndesip tur. Esh kómeskilenbegen. Qaıta ýaqyttyń aǵymymen, ózektiligi qoıýlana tústi. Biz túgili, shet elderde aqynnyń oılaryn ózderine aýdarǵanyn, oqta-tekte ǵalamtaor arqyly estip, blip júrmiz. Hosh! Álem ulyqtaǵan uly tulǵa jaıly aıtyp, kóńildiń qylyn shertiskendi bizderde jón sanaýdamyz.
Danysh Abaıdyń Almatydaǵy eskertkishin H.Naýryzbaev degen músinshi jasapty. Ótken XX ǵasyrdyń ekinshi shıreginde qoladan quıylsada esh eskirmegen. Dáp sol qalpyn saqtaı alǵan. Bıiktigi 13 metrden asatyn kórinedi.
Eskertkishti barlyq qyrynan sýretke tartym, fotoreportaj jasaýǵa tyrystym. Kúndiz, munda kelip gúl shoqtaryn qoıyp, taǵyzym jasaǵany baıqalady. Qortyta aıtqanda halqymyzdyń bas aqyny ári kósem sóz sheberine qansha gúl shoqtaryn qoıyp, myń márte taǵyzym jasasada artyq etpeıdi. Abaı qazaqtyń rýhanıat reformatory bolyp qala bermek.
Al bizder turaqty júrgizip kele jatqan túngi shahardyń kórikti jerlerine saıahattaýdy ármen qaraı jalǵastyrýdan tanbaımyz. Alyp megapolıs tańǵajaıypqa toly. Bul jerde tarıhı hám mádenı eskertkishter molynan. Buıyrsa, osy baǵytta birshama sharýa istelýdi kózdep, úıge oraldym.
