Prezıdent Qasym-Jomart Toqaevtyń Joldaýynda elimizdiń áleýmettik-ekonomıkalyq saıasatyn jańǵyrtýǵa baǵyttalǵan sharalary óte mańyzdy ekenin atap ótkim keledi.
Kez kelgen bıznes úshin ınvestısıa quıýǵa bolatyn qolaıly jaǵdaı, ashyqtyq pen kásipkerdiń múddesin qorǵaıtyn zańnamanyń bolýy óte mańyzdy. Qazirgideı kúrdeli geosaıası jaǵdaıda memlekettiń ishki saıası reformalarynyń ornyqtylyǵy asa qajet másele. Jalpy, ekonomıkany damytý, ındýstrıaldy-ınnovasıaǵa bet burý, shıkizatqa táýeldilikten arylý negizgi maqsattar. Otyz jyldan beri talaı baǵdarlamalardy qolǵa aldyq. Biraq kózdegen maqsatymyzǵa áli de jete almaı kelemiz. Degenmen, bul jolǵy Joldaýdyń jóni bólek boldy. Joldaýda basa aıtylǵan dúnıelerdiń biri – eldegi eńbek ónimdiligin kóterý. Bıznestiń básekelestigin arttyra otyryp, halyqty jumyspen qamtýdyń ózektiligi aıtyldy. Shıkizatqa áli de táýeldimiz, eńbek ónimdiligi tómendigi, ınovasıa jetkiliksizdigin eskere otyryp, ony sheshýdiń naqty joldaryn kórsetti. Jáne de Memleket basshysy otandyq bıznes úshin kúrdeli máselelerdiń biri – nesıe resýrstarynyń jetispeýshiligine toqtaldy. Ulttyq bank, Qarjyny retteý agenttigi, Úkimet naqty sektordy turaqty jáne qoljetimdi nesıeleýdi qamtamasyz etý úshin naqty sheshimder tabýy kerektigin atap ótti.
El Prezıdenti óz Joldaýynda eń tómengi aılyqtyń 70 myń teńgege ósetinin aıtty, bul 1,8 mıllıon azamattyń kirisine tikeleı áser etedi. Bul halyqtyń áleýmettik jaǵdaıyn jaqsartýǵa jasalǵan mańyzdy qadamdardyń biri dep oılaımyn. Sonymen qatar, keń áleýmettik suranysty eskere otyryp, áıelderdiń zeınetke shyǵý jasy 2028 jylǵa deıin 61 jas bolyp bekitiledi.
Aldaǵy ýaqytta kólikterdi jetkizýdiń barlyq zańsyz arnasyna tosqaýyl qoıý úshin sheshýshi sharalar qabyldaýy, olardy zańdastyrý úshin 200–250 myń teńgeden aspaıtyn mólsherde ýtılızasıa jáne bastapqy tirkeý úshin birjolǵy alym alýdy usynýy óte qýantarlyq jaǵdaı.
Sondaı-aq, Prezıdent Q.K.Toqaev ulttyq tabystyń ıgiligin halyqtyń barlyǵy birdeı kórip otyrmaǵanyn da aıtty. Osyǵan oraı, 2024 jyldan bastap, «Ulttyq qor balalarǵa» jobasy jumys isteıtin boldy. Bul norma kúshine engen kezde, ıaǵnı 2024 jyly 18 jasqa tolmaǵan barlyq balanyń atyna arnaýly shot ashylady. Shottaǵy qarajat shetel valútasynda bolatynyn atap ótken jón. Sonymen qatar, jınaq boıynsha paıyzdar esepteledi. Bul sharalar shottaǵy qarjyny ınflásıadan qorǵaýǵa múmkindik beredi. Osy ózgeristerdiń barlyǵyn iske asyrý siz ben bizdiń qolymyzda.