Oraldyq Ánel Sytdyqova Antarktıdany júzip ótti.
Qazaqtyń qaısar qyzy temperatýrasy -1,5 gradýs bolatyn muzdaı sýda 750 metrdi nebári 18 mınýtta eńsergen. Áneldiń kásibı sportpen shuǵyldanǵanyna nebári 10 jyl bolǵan.
Ánel Sytdyqova búginde Anglıanyń Oksford qalasynda turady. Jańa jyldy árkez týǵan jeri Oralda qarsy alýdy dástúrge aınaldyrǵan. Bıyl Áneldi áýejaıda ata-anasy ǵana emes, ondaǵan sport jankúıerleri kútip aldy. Oǵan basty sebep – 46 jastaǵy qaısar qyzdyń jýyrda Antarktıdada 750 metrdi júzip ótýi.
Qaımen Esendıarov, sport ardageri:
- La-Mansh, 20 kópir jáne Katalına buǵazyn júzip ótken adamdarǵa álemniń 3 táj hanshaıymy ataǵy beriledi. Sol klýbqa Ánel qaryndasymyz endi. Onymen ári qaraı sporttyq deńgeıin jalǵastyryp, kúni keshe qarasha aıynda Antarktıdada 13 eń myqty áıel-erler qatysqan marafonǵa qatysyp, tek qazaq emes, álemniń eń myqtylardyń biri dep esepteýge bolady.
Ánel Sytdyqova Batys Qazaqstan oblysynyń Tasqala aýdany Atameken aýylynda dúnıege kelipti. Ákesiniń sózinshe, bala kezden ójet bop ósken. Sportpen shyndap shuǵyldanýdy da 35 jasynda ǵana bastapty. Ashyq sýda júzgenine 10 jyl bolsa, qysqy júzýmen aınalysqanyna tek 5 jyl eken.
Álibek Sytdyqov, Áneldiń ákesi:
- Keshe Soltústik Irlandıaǵa, onda sý 10 gradýs, soǵan 3 ret daıyndalyp, eki ret óte almaı qaldy. Onda 34 shaqyrym. Bylaı aıtqanda, 20 saǵattaı júzý kerek. Biraq sý 10 gradýs. Men qansha aıttym: «qoısańshy, netseıshi, balalaryń bar», - dep. «Joq, taǵy kórem», - deıdi. Endi taǵy da úshinshi ret bolar.
Ánel Sytdyqova – trıatlonnan Qazaqstannyń tuńǵysh temir hanshaıymy. 2019 jyly Anglıa men Fransıa arasyndaǵy 34 shaqyrymdyq La-Mansh buǵazyn 15 saǵatta gıdrokostúmsiz júzip ótse, 22 jyly Manhetten kópirlerin aınalyp, 48 shaqyrymdy artqa tastaǵan. Sol jyly 34 shaqyrymdyq Katalına buǵazyn baǵyndyrǵan.
Ánel Sytdyqova, júzgish-marafonshy:
- Salqyn sýda júzý qıyn. Qıyn ǵana emes qaýipti, eger tájirıbeń bolmasa. Óıtkeni muhıtta tún ishinde nebir jyrtqysh balyqtar qasyńnan ótip jatady. Sezip bara jatasyń. Tolqyndar qandaı? Aısbergter kezdesedi. Muzdaı sýda aıaq qolyń qurysyp ta qalýy múmkin. Biraq qysta sýǵa túskennen keıin myqty kúsh, energıa sezinesiń. Men bala kezde baseınge barmadym. Júzýmen sońǵy kezde ǵana shyndap shuǵyldandym. Anglıada ashyq sýda jyl boıy júzýge múmkindik mol.
Ánel týǵan jerinde de shynyǵýyn toqtatpady. Úsh kún boıy qalalyq saıabaqqa kelip, aq qar, kók muzda Shaǵanǵa shomyldy. Úsh balanyń anasy ári qazaqtyń qaısar qyzy keleshekte Soltústik polústi baǵyndyrýdy josparlap qoıǵan.