Transkaspıı halyqaralyq kólik baǵytynda tranzıttik júktiń ótý merzimi 12 kúnnen 6 kúnge qysqardy.
Bıyl bul kórsetkishti bes kúnge deıin azaıtý josparda tur. Jalpy, Qytaıdan Qara teńizdegi porttarǵa júk jetkizý merzimi 53-ten 23 kúnge deıin azaıdy. Jyl sońyna qaraı 14-18 kúnge qysqarýy tıis, dep habarlaıdy Almaty-akshamy.kz 24.kz-ke silteme jasap.
Bul jaıynda Premer-Mınıstrdiń tóraǵalyǵymen ótken Keńeste aıtyldy. Jıynda Qazaqstannyń temirjol ınfraqurylymyn jańǵyrtý, Aqtaý portynda konteınerlik hab qurý, qaıta tıeý tehnıkasy men munaı quıý aılaqtaryn qalpyna keltirý jaıy talqylandy. Quryq portynda jańa aılaq salý, kópfýnksıonaldy jáne astyq termınaldaryn iske qosý josparda turǵany aıtyldy.
2030 jylǵa qaraı Kaspııde 10 munaı quıý barjasy, 8 parom, 6 tanker jáne konteınerlik keme jumys isteı bastaıdy. Keńeste Qazaqstan men Qytaı arasyndaǵy kedendik rásimderdi ońtaılatý men tasymaldaý kelisimin daıyndaý máselesi qaraldy.