Máslıhat depýtattary shyǵyn men zalaldy óteý jónindegi óńirlik komısıa quramyna enip, mán-jaıdy tikeleı baqylaıdy.
Qańtar aıynda Qazaqstanda bolǵan lańkestik áreketten jazyqsyz azamattar zardap shekti. Sonymen qatar, shaǵyn jáne orta bıznes qurylymdary, saýda nysandary, memlekettik mekemeler, ákimdik men polısıa bólimsheleri, departament ǵımarattaryna orasan zor nuqsan keltirildi. Memleket basshysy Qasym-Jomart Kemeluly Toqaevtyń Úndeýi el basyna kún týǵan shaqta qazaq jurtynyń judyryqtaı jumylyp, birigýine túrtki boldy, dep habarlaıdy Almaty-akshamy.kz.
Almaty máslıhatynyń depýtattary osyndaı aýyr kúnderi qalamyzǵa jasalǵan terrorlyq shabýyl saldarymen kúresip jatqan azamattarǵa barynsha qoldaý kórsetti.
El basyna kún týǵan qıyn kúnderi qala depýtattary 10 emdeý mekemesine (№4 qalalyq klınıkalyq aýrýhana, jedel sanıtarlyq-medısınalyq kómek, kardıologıalyq ortalyq, Almaty kópsalaly aýrýhanasy, qalalyq juqpaly aýrýlar aýrýhanasy, ftızıopýlmonologıa ortalyǵy, №1 jáne №2 qalalyq balalar aýrýhanasy, balalar juqpaly aýrýlar aýrýhanasy) jáne halyqtyń áleýmettik qorǵalmaǵan toptaryna jalpy somasy 78 mln teńgege 50 tonnadan astam azyq-túlik jetkizýdi uıymdastyrdy. Onyń ishinde, 7-10 qańtar aralyǵynda qalanyń medısınalyq mekemelerine jalpy kólemi 21 tonnadan asatyn azyq-túlik ónimderi kómek retinde jetkizildi.
Eki júzge jýyq áskerı áreket etý tájirıbesi bar azamattarmen birlese otyryp, №1 jáne №2 balalar aýrýhanasy, №4 qalalyq klınıkalyq aýrýhanasy jáne jedel medısınalyq járdem stansıasy qorǵaýǵa alyndy. Emdeý mekemeleri teris pıǵyldylar úshin nysanaǵa aınalýy múmkin edi. Óıtkeni lańkester shabýyl jasap, osyndaı iri ǵımarattarǵa kóz tigedi. Ári emdeý mekemeleri olarǵa qarsy kúsh kórsete almaıdy degen oıda bolady. Qylmystyq elementter: terrorıster, buzaqylar, qaraqshylar. Olar emhanalarǵa, aýrýhanalar men perzenthanalardy nysanaǵa alyp, ol jerde kóbine áıel azamattar qyzmet etetindikten, qarsylyq kúshi bolmaıtynyn aldyn ala josparlaıdy ári tonaý, kúıretý sekildi teris pıǵyldaryn kózdeıdi.
«Qaýipti sátte qorǵaý jumystaryn ońtaıly uıymdastyrǵan Murat Ábdishúkirovke, Mark Beıdalı men barlyq áskerı salanyń ardagerlerine máslıhat úlken alǵys bildiredi. Bizdiń seriktesimiz Gadjı Gadjıev, quqyq qorǵaý organdary, tótenshe jaǵdaılar qyzmeti jáne aýrýhanalar úshin 10 myń adamǵa ystyq túski as daıyndap, jetkizip berdi. Sondaıyq-aq, demeýshiler men eriktiler de aýrýhanalarǵa jáne muqtaj azamattarǵa azyq túlik jetkizgeni úshin erekshe alǵys aıtqymyz keledi», - dedi Almaty máslıhatynyń hatshysy Stanıslav Kankýrov.
Sonymen qatar, depýtattar men ÚEU-nyń qarjylyq qoldaýymen 572 otbasyna onyń ishinde Qazaq zaǵıptar qoǵamynyń ótinishi boıynsha 300 otbasyna, sondaı-aq zeınetkerlik jastaǵylar men jalǵyz basty azamattar, múmkindikteri shekteýli jandar jáne ómirlik qıyn jaǵdaıǵa tap bolǵandar, daǵdarys ortalyqtary men «Ana úıinde» turyp jatqan adamdar úshin azyq-túlik satyp alyndy.
«Depýtattar qala turǵyndaryn materıaldyq turǵyda ǵana qoldap qoımaı, donor da boldy - zardap shekkenderge qan tapsyrdy. Qaıyrymdylyq donorlyqtyń maqsaty - ómirdi saqtap qalý úshin donorlyq qan qoryn tolyqtyrý. Donorlyq qanǵa degen qajettilik árdaıym týyndaıtyny belgili. Al Qazaqstandaǵy terorıstik shabýyl kúnderi donorlyq qanǵa degen suranys birneshe ese artqany túsinikti. Óıtkeni shuǵyl qan quıýdy qajet etetin jaralanǵandarǵa qoldaý qajet edi. Osyny basshylyqqa alǵan depýtattar zardap shekkenderge janashyr bola otyryp, dárigerlerdiń ruqsatymen qan qoryn tolyqtyrýǵa atsalysty», - dep túsindirdi máslıhat hatshysy.
Jaqyn arada depýtattar qala búdjetin qaıta qarap, qarajattyń bir bóligin zalaldy qalpyna keltirýge jáne t.b. baǵyttaýy tıis.
Memleket lańkestik qylmystardan zardap shekken. Atap aıtqanda, ǵımarattar men qurylys nysandary, búlingen jyljymaly múlik pen jabdyqtar, sondaı-aq urlanǵan taýarlardan bızneske keltirilgen zalaldy ótep berý jaǵyn qarastyrýda.
Memleket basshysy buǵan deıin málimdegendeı, bızneske tártipsizdik barysynda keltirilgen zalaldy óteý qarastyrylady. Bızneske keltirilgen zalaldy óteý tártibi ázirlendi. Máslıhat depýtattary shyǵyn men zalaldy óteý jónindegi óńirlik komısıa quramyna enip, mán-jaıdy tikeleı baqylaıdy. Sondaı-aq, 25 depýtat terorıstik is-qımyl nátıjesinde oryn alǵan shyǵyn kólemin anyqtaýǵa baǵyttalǵan aýdandyq jumys toptaryna engizildi.