Almatydaǵy İlıas Esenberlın atyndaǵy №25 gımnazıada ár jyldary tanymal saıası qaıratkerler, ǵalymdar, óner adamdary oqyǵan.
Atalǵan mekteptiń eń tanymal túlegi – Qazaqstan prezıdenti Qasym-Jomart Toqaev.
«Juldyzdy» mektep
90 jylǵa jýyq tarıhy bar №25 gımnazıa alǵashynda Pýshkın kóshesindegi 73-úıde ashylǵan. Bastapqyda munda tek tórt synyp bolǵan. 1937 jyly tolyq orta mektepke arnalǵan jańa ǵımarat salynyp, 1962 jyly janynan taǵy ǵımarat boı kótergen. 2004 jyldyń aqpanynda Qazaqstan úkimetiniń sheshimimen mektepke jazýshy İlıas Esenberlınniń aty berilgen.
№25 gımnazıada bilim alǵan ataqty túlekter arasynda: Qazaqstan prezıdenti Qasym-Jomart Toqaev, saıasatker Vladımır Jırınovskıı, tarıhshy ári jýrnalıs Iosıf Malár, arheolog Kemel Aqyshev, ónertanýshy Anatolıı Kelberg, kınorejısser Vadım Ábdirashıtov, A-Stýdıo tobynyń bas-gıtarısi Vladımır Mıkloshıch, Qazaqstannyń Fransıadaǵy elshisi Jan Galıev, rejıser Iýrıı Pıskýnov, kompozıtor Álim Zaıyrov, A-Stýdıo tobynyń ánshisi Baǵlan Sádýaqasov, saıasatker Dáýlet Sembaev, neırohırýrg Iýrıı Anoshın, ǵalym Abaı Baıgenjınder bar.
Bolashaqqa jazylǵan hat
Bilim oshaǵynyń 2006 jyldan bergi basshysy Ǵazıza Amanbaıdyń aıtýynsha, bolashaqqa hat jazyp, ony ýaqyt kapsýlasyna salý gımnazıadaǵy basty dástúr eken. Bul dástúr 1970 jyldan bastalypty. 2003 jyly Qazaqstannyń syrtqy ister mınıstri qyzmetinde bolǵan Qasym-Jomart Toqaev mektepke kelip, sol qyzyqty dástúrdi eske alǵan. Biraq ol kýbok tek bir jyldan keıin tabylǵan.
«2003 jyly mektepke túlek retinde kelgen Toqaev vestıbúlge kire sala «osy bir tusqa biz kýbokty jasyrǵan edik» dedi. Biz ol joly eshteńe túsinbedik. 2004 jyly vestıbúldi rekonstrýksıalaý kezinde qurylysshylar qabyrǵadan jádigerdi taýyp aldy. Onyń beti taqtaımen jabylǵan, ishinde osy kýbok jatty. Biz ony ashyp kórdik. Onyń ishinde komsomolshylardyń haty jatty. 1970 jylǵa alǵashqy hatty 1964 jylǵy túlekter jazǵan. Sol shaqta alaý alyp júretin sherý júrgen. Sonda komsomolshylar eki bettik paraqqa revolúsıanyń júz jyldyǵyna arnap 2017 jyldyń túlekterine hat arnaǵan», - dedi dırektor.
Kapsýlany tórt komsomolshy bekitken. Olardyń qatarynda memleket basshysy Qasym-Jomart Toqaev ta bolǵan.
2005 jyly gımnazıa 40 jyl burynǵy bastamany jalǵastyryp, oqýshylar men ustazdar 2030 jylǵa arnap hat jazdy jáne óz ýaqyt kapsýlalaryn qabyrǵaǵa bekitti. Al 2021 jyly mektepte bolǵan Qasym-Jomart Toqaev 2050 jyly ashylýy tıisti ýaqyt kapsýlasyn ornalastyrýǵa qatysqan.
Shákirt Toqaev
«Prezıdent oqyǵan kabınetti de anyqtap aldyq. Ol kabınetti kórdi. Sol jyldary ár synyp óz kabınetinde otyrǵan. Sondyqtan 10 "V" synybynyń kabınetin taptyq. Úshinshi qatardyń úshinshi partasynda Toqaev otyrǵan. Orys tili jáne ádebıeti pániniń muǵalimi Anna Borısovna Igdal prezıdenttiń synyp jetekshisi bolǵan. Maǵan ol kisimen birneshe jyl jumys isteý buıyrdy», - dedi Ǵazıza Amanbaı.
Bolashaq prezıdentke tarıhtan sabaq bergen, Toqaevtyń súıikti ustazy – Serafıma Fılatovna Nıkonova 92 jasynda ómirden ótken.
Bilim alǵan uıasyn árdaıym ulyqtap júretin shákirt Toqaev mektep kitaphanasyna túrli janrdaǵy kitaptar syılapty.
Toqaev gımnazıada áli kúnge deıin fransýz tilin tereńdetip oqytatynyn, Fransıa elshiligimen, Fransýz alánsymen tyǵyz baılanys bar ekenin, halyqaralyq deńgeıde oqýshylarmen almasý júrgizilip jatqanyn erekshe atap ótti. Prezıdent bul jaǵdaıdy joǵary baǵalap, osy dástúrlerdi jáne baılanysty saqtaý qajet ekenin aıtty.
Mektep mýzeıi
Bul bilim oshaǵynyń taǵy bir ereksheligi – mekteptegi mýzeı. Mýzeıge de mekteptiń aty sekildi İlıas Esenberlınniń esimi berilgen.
Onyń uly da osy mektepti bitirip, ákesiniń ústelin, baspa mashınasy men kitaptary sekildi jeke zattaryn mýzeı qoryna tabystaǵan.
Munda hattar men qurmet taqtalarynan bólek, soǵys jyldarynan beri mektepti basqarǵan dırektorlardyń aty-jóni jazylǵan úı kitapshasy bar.
Mýzeıdegi qurmetti qonaqtar kitabyna Memleket basshysy da jazba qaldyrǵan.
Mýzeıde gımnazıanyń árbir ataqty túlegine arnap jeke burysh daıyndaý josparlanǵan. Mektep ákimshiligi Memlekettik arhıvten eski sýret taýyp alǵan. №25 mektep sol jyldary arhıvke qujat tapsyratyn jalǵyz mektep bolypty.