«Zań» Medıa-korporasıasy» JSHS Kemel Toqaev atyndaǵy detektıv shyǵarmalar baıqaýyn 2018 jyldan beri uıymdastyryp keledi. Búginge deıin bes ret ótken baıqaý kópshilikke jaqsy tanymal.
Osy dodanyń arqasynda talaı qalamy qarymy jazýshy, jýrnalıser, zańger, quqyq qorǵaýshylar detektıv janrynda shyǵarma jazyp, baıqaýdyń tartysty ótýine úles qosty. Bul shyǵarmashylyq saıys sonymen birge jas qalamgerlerdiń jańa qyrynan tanylýyna múmkindik týǵyzdy. Munyń bári ádebıettiń kenjelep qalǵan janrynyń túrlenýine, jandanýyna yqpalyn tıgizgeni anyq.
Baıqaý júldegerleriniń úzdik shyǵarmalary toptastyrylǵan «SHYTYRMAN» jınaǵy korporasıanyń 2018 jyldan bergi eńbeginiń jemisi, detektıv janrynyń damýyna qosylǵan qomaqty úles desek qatelespeımiz.
Al bıylǵy detektıv shyǵarmalardyń altynshy baıqaýy jazýshynyń 100 jyldyǵymen tuspa-tus kelip otyr. Ári bıylǵy sharaǵa Jetisý oblysynyń ákimdigi qoldaý kórsetkenin aıta ketkenimiz jón.
Kemel Toqaevtyń týǵan ólkesinde ótetin baıqaýdyń artyqshylyǵy az emes. Úmitkerlerdiń baıqaý talabyna saı keletin shyǵarmalary respýblıkalyq «Zań gazeti» men «Iýrıdıcheskaıa gazeta» basylymdarynda jaryq kóredi.
Baıqaýǵa joldanǵan shyǵarmalar zanmedia.kz saıtyndaǵy DETEKTIV aıdarynda jınaqtalyp, kópshiliktiń oqyp tanysýyna, pikir bildirýine múmkindik jasalady.
Shara aıasynda buǵan deıingi baıqaýlarda bas júldeni ıelengen úzdikter Taldyqorǵanǵa arnaıy shaqyrylyp, sheberlik sabaǵyn ótkizedi.
EŃ BASTYSY, BIYLǴY BAIQAÝDYŃ JÚLDE QORY DA OSAL EMES.
Jetisý oblysynyń ákimdigi Kemel Toqaev atyndaǵy baıqaýdyń jeńimpazyna 1,5 mıllıon teńge júlde taǵaıyndap otyr.
Odan bólek:
1 birinshi oryn ıesi – 1 mln teńge;
2 ekinshi oryn ıesi – 750 myń teńgeden;
3 úshinshi oryn ıesi – 500 myń teńgeden qarjylaı syılyq alady.
Jaqsy isten Jetisý oblysynyń sot, prokýratýra, polısıa jáne ádilet departamenti de shet qalǵan joq. Bul qurylym jetekshileri de baıqaýdaǵy úzdik shyǵarma ıelerin yntalandyrý maqsatynda birneshe syılyq taǵaıyndap otyr.
BAIQAÝ EREJELERİ:
Kemel Toqaev atyndaǵy detektıv shyǵarmalar baıqaýyna jiberiletin shyǵarmalar detektıv janrynyń tabıǵatyna saı bolýy kerek;
Bir avtor birneshe shyǵarmasyn usyna alady, irikteý uıymdastyrýshylar quzyryna kiredi;
Mátin Microsoft Word redaktorynda terilýi tıis, qarpi – Times New Roman, kegl — 14, jol aralyq ınterval – 1, túzetilýi – eninen, shet-shetinen – 2 sm.. Úmitker óziniń aty-jónin, tólqujatynyń kóshirmesin, uıaly baılanys nomerin, elektrondy poshtasyn tolyq jazýy kerek.
Shyǵarmalar 2023 jylǵy 15 qazan saǵ 18.00-ge deıin qabyldanady;
Belgilengen merzimnen keshigip jiberilgen, konkýrstyń talabyna sáıkes kelmeıtin, buryn basqa baıqaýǵa qatysqan, sondaı-aq «Antıplagıat» júıesinde avtorlyqqa saraptamadan ótkizilmegen shyǵarmalardyń konkýrsqa qatysýyna jol berilmeıdi;
Qazannyń 15-25 aralyǵynda úmitkerler shyǵarmasyn qazylar irikteıdi;
Baıqaý jeńimpazdaryn marapattaý 8 qarashaǵa belgilengen.