Búgin Túrkıanyń ulttyq meıramy – Respýblıka kúni.
Qasym-Jomart Toqaev Rejep Taııp Erdoǵanǵa joldaǵan jedelhatynda Túrkıanyń ulttyq meıramy – Respýblıka kúnimen shyn júrekten quttyqtap, Qazaqstan halqynyń jáne jeke óz atynan izgi nıetin jetkizdi, dep habarlaıdy almaty-akshamy.kz Aqordanyń resmı saıtyna silteme jasap.
Qazaqstan Prezıdenti búginde Túrkıanyń saıası, áleýmettik-ekonomıkalyq jáne mádenı-gýmanıtarlyq baǵytta orasan tabystarǵa qol jetkizgenin, óńirlik jáne jahandyq mańyzy zor máselelerdi sheshýdegi belsendiligi men tabandylyǵy arqyly álemdik sahnada laıyqty orynǵa ıe bolǵanyn atap ótken.
Sondaı-aq Qasym-Jomart Toqaev qýatty Anadoly eliniń armanyn arqalaǵan saıasatker Rejep Taııp Erdoǵannyń eńbegi árdaıym jemisti bolýyna tilektestik bildirgen.
«Qazaqstan men Túrkıa arasynda qalyptasqan dástúrli dostyq pen ózara qoldaýǵa negizdelgen san qyrly salalardaǵy strategıalyq áriptestigimiz bolashaqta óziniń jalǵasyn taýyp, baýyrlas halyqtarymyzdyń ıgiligi úshin qarqyndy damı beretinine kámil senemin. Syndarly da mazmundy ekijaqty dıalogymyzdy jalǵastyrý jáne seriktestigimizge tyń serpin berý joldaryn talqylaý úshin jýyq arada ózińizben Túrkitildes memleketteri yntymaqtastyǵy keńesiniń 8-shi samıtinde júzdesýdi asyǵa kútemin. Osy múmkindikti paıdalanyp, qymbatty baýyrym, Sizge sarqylmas kúsh-qýat, jaýapty qyzmetińizge tolaǵaı tabys, al túrik aǵaıyndaryma baıandy órkendeý men qut-bereke tileımin», – dep jazylǵan jedelhatta.