Memleket basshysy Qasym-Jomart Toqaevtyń tapsyrmasyna sáıkes, balalar úıi kóshirilmeıdi, - dep habarlaıdy Aqshamnews.kz tilshisi.
Bul týraly Prezıdentiniń keńesshisi - baspasóz hatshysy Rýslan Jeldibaı málimdedi.
"Baǵanashyl" balalar úıiniń tárbıelenýshilerin Almatydan Qonaev qalasyna kóshirýge baılanysty jaǵdaımen tanysqan Qasym-Jomart Toqaev Almaty ákimi Darhan Satybaldyǵa oqýshylardyń ońtústik astanada bilim alýyn jalǵastyrý úshin balalar úıine jóndeý jumystaryn júrgizýdi jáne bul nysandy qalanyń balansyna alýdy tapsyrdy", - delingen habarlamada.
Memleket basshysynyń tapsyrmasyna sáıkes, balalar úıi kóshirilmeıdi.
"Bul jaǵdaıǵa baılanysty Prezıdent Ákimshiligi qyzmettik tekseris júrgizedi. Ata-anasynyń qamqorlyǵynsyz qalǵan balalardyń zań sheńberindegi barlyq quqyǵy tolyq saqtalady", - delingen habarlamada.
Buǵan deıin ne bolǵan edi?
2025 jylǵy naýryzda №1 oblystyq balalar úıiniń tárbıelenýshileri óz mekemesiniń Almatydan Qonaevqa kóshirilip jatqanyn aıtyp shaǵymdandy. Qoǵam belsendileri Almatynyń elıtalyq aýdandarynyń biri – Baǵanashyldaǵy qymbat jer telimi qurylys kompanıalarynyń kózine túsip, olar turǵyn úı keshenin salǵysy keledi dep málimdedi. Balalar úıiniń tárbıelenýshileri Qonaevtaǵy jańa ǵımaratqa kóshirmeýdi surap, vıdeoúndeý jarıalady.
Eske salaıyq, keshe Almaty oblysynyń ákimdigi "Baǵanashyl" balalar úıine qatysty pikir bildirgen edi.
Taratylǵan resmı málimetke sáıkes, Almatydaǵy "Baǵanashyl" balalar úıi Almaty oblysynyń menshiginde jáne uzaq ýaqyt boıy oblystyq qurylymdardyń basqarýynda bolǵan. Ǵımarat apatty dep tanylǵanyna baılanysty jer telimin Almaty qalasynyń balansyna berý týraly sheshim qabyldanǵan.
"2020 jyly "BıS Proekt" JSHS jasaǵan qorytyndyǵa sáıkes, ǵımaratqa kúrdeli jóndeý qajet bolǵan. Alaıda ony qalpyna keltirýge qarajat bólinbedi. 2024 jyly "Astanaqurylysservıs" JSHS júrgizgen jańa tekseris nysannyń tolyqtaı paıdalaný úshin jaramsyz ekenin rastady. Sonymen qatar, seısmıkalyq aımaqqa qatysty qaýipter de anyqtaldy", – dep habarlady ákimdik.
Oblys ákiminiń qaýlysy men Bilim basqarmasynyń buıryǵyna sáıkes, balalar úıiniń tárbıelenýshilerin kezeń-kezeńimen Qonaevtaǵy jańa balalar úıine kóshirý josparlanyp otyr. Ákimdiktiń málimetinshe, 180 oryndyq zamanaýı jańa ǵımarat jeke ınvestısıalar esebinen salynyp, memleket menshigine berilgen.
"Ol barlyq normatıvke saı jáne balalardyń turýyna, oqýy men damýyna qajet jaǵdaılarmen tolyq jabdyqtalǵan", – dedi ákimdik ókilderi.
Ákimdik ókilderi qabyldanyp jatqan sharalar balalardyń qaýipsizdigine, sapaly bilim alýyna jáne qoldaý kórsetýge baǵyttalǵanyn atap ótti.
Sheneýnikter málimetinshe, Balalar úıi turǵan jer telimine jeke ınvestordyń turǵyn úı keshenin salý týraly aqparat shyndyqqa janaspaıdy.
"Bul jer telimi Almatynyń komýnaldyq menshigine beriledi", – delingen habarlamada.