Bul sport nysany tolyqtaı jeke kásipkerdiń qarajatyna salynǵan.
Memleket basshysy Qasym-Jomart Toqaev Taldyqorǵan qalasyndaǵy jańadan salynǵan Jetysu Arena jabyq muz aıdynyn aralap, sportshylarmen áńgimelesti, dep habarlaıdy Almaty-akshamy.kz Aqordaǵa silteme jasap.
Sport nysany tolyqtaı jeke kásipkerdiń qarajatyna salynyp, Respýblıka kúni ashylǵan. Jalpy ınvestısıa kólemi – shamamen 900 mıllıon teńge.
Kásipker Muhametjan Serikulynyń aıtýynsha, bul nysanda turǵyndar short-trek, hokeı jáne mánerlep syrǵanaý sıaqty qysqy sport túrlerimen aınalysa alady.
Sonymen qatar munda paralımpıadalyq, ıaǵnı shanaly hokeımen shuǵyldanýǵa bolady. Elimizde hokeıdiń bul túrimen aınalysýǵa arnalǵan eki muz arenasy bar. Onyń biri Astanada, ekinshisi osy Taldyqorǵan qalasynda ashylyp otyr.
Nysannyń jalpy aýmaǵy – 2235,8 sharshy metr. Keshen kásibı tehnologıalyq quraldarmen, onyń ishinde tońazytqysh, muz quıý jáne sport jabdyqtarymen qamtylǵan. Sonyń nátıjesinde munda jyl boıy úzdiksiz jattyǵýǵa múmkindik bar. Atalǵan jabyq muz aıdyny Qurlyqaralyq hokeı lıgasynyń jáne Ulttyq hokeı lıgasynyń standarttaryna saı keledi.
Qasym-Jomart Toqaev el ıgiligi úshin eńbek etip jatqan kásipkerge rızashylyǵyn bildirdi.
Prezıdent sportshylarmen áńgimelesý kezinde memleket atalǵan salany odan ári qoldaıtynyna toqtalyp, jastardyń sportpen turaqty aınalysqanyn quptaıtynyn aıtty.