Oblys ákimine óńirdi odan ári damytýǵa tapsyrma berildi.
Memleket basshysy Jambyl oblysynyń ákimi Erbol Qarashókeevti qabyldady, dep habarlaıdy aqshamnews.kz
Erbol Qarashókeev:
óńirdiń bıylǵy birinshi jartyjyldyqtaǵy áleýmettik-ekonomıkalyq damýynyń qorytyndylary týraly esep berdi;
oblys ekonomıkasy qarqyndy ósip keletinin aıtty:
– qurylys salasynda 12,3 paıyz, baılanysta 8,5 paıyz, kólik baǵytynda 7,4 paıyz, agrarlyq sektorda 4 paıyz ósim bar. Turǵyn úıdi paıdalanýǵa berý kórsetkishi 2,3 paıyzǵa (311 myń sharshy metr) artqan;
– negizgi kapıtalǵa 196,3 mıllıard teńge tartylǵan. Óńirdiń 2027 jylǵa deıingi ınvestısıalyq portfelinde jalpy quny 2,5 trıllıon teńgeni quraıtyn 70 joba bar. Bul 6,3 myń jumys ornyn ashýǵa múmkindik beredi;
– jyl sońyna deıin 19 jańa óndiris ornyn iske qosý josparlanyp otyr;
– oblys ekonomıkasyndaǵy óńdeýshi ónerkásip sektorynyń úlesi 64,5 paıyzǵa jetken. Bul rette sheteldik iri kompanıalarmen kelisim aıasynda júzege asyp jatqan fosfor ónerkásibiniń róli aıryqsha;
– búginde aımaq sharýalary egin jınaý naýqanyna kirisip ketti. Boljam boıynsha bıyl negizgi daqyldardyń jalpy túsimi 2,1 mıllıon tonnaǵa jetedi;
óńirdegi áleýmettik ınfraqurylymdy damytý jóninde baıandady:
– oblysta 26 densaýlyq saqtaý, 41 bilim berý mekemesiniń qurylysy júrip jatyr;
– bıyl 452 medısınalyq jabdyq pen 38 sanıtarlyq avtokólik satyp alý josparlanýda;
– jyl sońyna deıin 19 mektep paıdalanýǵa beriledi. Nátıjesinde 2 apatty, 4 úsh aýysymdy, 3 tozyǵy jetken, sondaı-aq oqýshy orny jetispeıtin 10 mekteptiń máselesi sheshiledi;
– Memleket basshysynyń tapsyrmasyna sáıkes osy jyldyń sońyna deıin 37 eldi meken ortalyqtandyrylǵan aýyz sýmen qamtamasyz etiledi;
– respýblıkalyq «Taza Qazaqstan» ekologıalyq aksıasy aıasynda óńirdegi tarıhı-mádenı eskertkishter, saıabaqtar men gúlzarlar, arnalar men aryqtar tazartylyp, 60 myńǵa jýyq kóshet otyrǵyzylǵan.
Prezıdent oblys ákimine óńirdi áleýmettik-ekonomıkalyq turǵydan odan ári damytýǵa jáne turǵyndardyń tabysyn arttyrýǵa baǵyttalǵan birqatar tapsyrma berdi.