Premer-Mınıstr Oljas Bektenov zańsyz ımporttyń aldyn alý úshin zańdaǵy olqylyqtardy joıýdy jáne «kóleńkeli» ımportqa jol bermeý úshin birqatar sharalardy qabyldaýdy tapsyrdy, dep habarlaıdy aqshamnews.kz
Úkimet basshysy beıindi mınıstrlikterge taýarlardyń birneshe katalogtaryn saraptap, olardyń artyqtaryn joıýdy mindettedi. Bul qadam ónimdi bir katalog arqyly ımporttap, basqa katalogpen otandyq ónim retinde ótkizýge múmkindik beretin zańsyz sqemalardy boldyrmaýǵa baǵyttalǵan.
Qarjy mınıstrligi halyqaralyq standarttardy eskere otyryp, memlekettik satyp alýdy júzege asyrý úshin Taýarlardyń elektrondyq katalogyn jasaǵan. Endi Qarjy mınıstrligi Saýda mınıstrligimen jáne basqa da múddeli memlekettik organdarmen birlesip, artyq katalogtardy joıýǵa jaýapty bolady.
Sonymen qatar, Premer-Mınıstr Qazaqstanda otandyq ónimder bola tura, ımporttyq taýarlardy satyp alý tájirıbesin toqtatý qajettigin atap ótti. Ol Ónerkásip mınıstrligine memlekettik organdarmen jáne uıymdarmen birlesip, otandyq shıkizat pen materıaldardy paıdalaný boıynsha iri merdiger kompanıalardyń mindettemelerine monıtorıń júrgizýdiń tıimdi tetigin ázirleýdi tapsyrdy.