Qazaqstan Respýblıkasy Prezıdenti men Fransýz Respýblıkasy Prezıdentiniń birlesken málimdemesi
1.Qazaqstan Respýblıkasynyń Prezıdenti Qasym-Jomart Toqaevtyń shaqyrýymen Fransýz Respýblıkasynyń Prezıdenti Emmanúel Makron 2023 jylǵy 1 qarashada Qazaqstanǵa resmı saparmen keldi.
2.Qazaqstan Respýblıkasy men Fransýz Respýblıkasy arasyndaǵy strategıalyq áriptestik týraly sharttyń on bes jyldyǵynda Memleket basshylary ózderiniń eki el arasyndaǵy basym qatynastardy qarqyndatýǵa jáne ártaraptandyrýǵa ortaq umtylystaryn rastady.
3.Prezıdentter Qazaqstan men Fransıa arasyndaǵy barlyq deńgeıdegi senimdi jáne turaqty dıalogqa qanaǵattanýshylyq bildirip, saıası, ekonomıkalyq, ónerkásiptik jáne saýda yntymaqtastyǵynyń joǵary serpinin quptady.
4.Dostyq pen ózara túsinistik rýhynda ótken kelissózder barysynda Memleketter basshylary halyqaralyq jáne óńirlik kún tártibindegi ózekti máselelerdi jan-jaqty talqylady. Halyqaralyq quqyq pen BUU Jarǵysynyń irgeli qaǵıdattaryna, atap aıtqanda, barlyq memleketterdiń egemendigin, táýelsizdigin, aýmaqtyq tutastyǵyn jáne halyqaralyq moıyndalǵan shekaralardyń myzǵymastyǵyn qurmetteýge, sondaı-aq daýlardy beıbit jolmen sheshýge berik beıildiligin atap ótti. Jahandyq jáne óńirlik deńgeıde, sonyń ishinde Taıaý Shyǵysta beıbitshilikti, qaýipsizdik pen turaqtylyqty nyǵaıtýǵa ortaq umtylystaryn rastady. Ýkraına tóńiregindegi jaǵdaıǵa, sonyń gýmanıtarlyq saldarlaryna jáne jahandyq ekonomıka men ásirese osal elderdiń azyq-túlik qaýipsizdigine tıgizgen áserine baılanysty ózderiniń tereń alańdaýshylyǵyn atap ótti.
5.Prezıdentter klımattyń ózgerýine qarsy kúrestiń mańyzdylyǵyn rastady. Ortalyq Azıada klımattyń ózgerýinen týyndaǵan syn-qaterlerge qarsy óńirlik yntymaqtastyq sheńberinde qabyldanǵan naqty sharalarǵa qanaǵattanýshylyq bildirip, osy baǵytta, atap aıtqanda, sý resýrstaryn turaqty basqarý salasynda odan ári kúsh-jiger jumsaýǵa shaqyrdy. Sondaı-aq, BUU Bas Assambleıasy alańynda sıaqty iri is-shara aıasynda birlesip halyqaralyq konferensıa uıymdastyrý múmkindigin qarastyrýǵa ýaǵdalasty.
Qazaqstannyń ınovasıalyq kómirtegisiz energıa kózderine kóshýine qosylatyn úles bolyp tabylatyn elektr qýatyn saqtaıtyn qondyrǵysy bar qýattylyǵy 1,2 GVt jel elektr stansıasyn salý boıynsha aýqymdy jobany júzege asyrýda qol jetkizilgen progresti quptady.
6.FDA tobynyń (Agence française de développement – Fransýz damý agenttigi) Qazaqstandaǵy qyzmeti týraly úkimetaralyq kelisimge qol qoıylýyn quptady. FDA-nyń Qazaqstandaǵy jumysy energetıkalyq kóshý, qorshaǵan orta jáne áleýmettik damý máseleleri boıynsha yntymaqtastyqty nyǵaıtýǵa yqpal etedi. Sý, energetıka jáne densaýlyq saqtaý sektorlarynda bastapqy jumystardy júrgizý jáne keıinnen Astanada ókildik ashý josparlanýda.
7.Taraptar Qazaqstan Respýblıkasy men Eýropa Odaǵy jáne oǵan múshe memleketter arasyndaǵy Keńeıtilgen áriptestik jáne yntymaqtastyq týraly kelisim aıasynda ózara tyǵyz yntymaqtastyqty jalǵastyrýǵa ázirligin málimdedi. Osyǵan oraı, Prezıdentter 2023 jylǵy maýsymda «Ortalyq Azıa-Eýropa Odaǵy» ekinshi samıtiniń ótýin jáne 2023 jylǵy 23 qazandaǵy EO-OA mınıstrler kezdesýi barysynda EO men Ortalyq Azıa arasyndaǵy baılanystardy tereńdetý jónindegi birlesken jol kartasynyń qabyldanýyn quptady. EO men Ortalyq Azıa arasynda ózara baılanys salasyndaǵy jáne «Global Gateway» Eýropa strategıasyn iske asyrýdaǵy yntymaqtastyqtyń mańyzyn atap ótti.
8.Memleket basshylary bir-birine mańyzdy áriptes bolyp tabylatyn eki el arasyndaǵy ekonomıkalyq yntymaqtastyqty ártaraptandyrýdy jáne tereńdetýdi jalǵastyrýǵa ýaǵdalasty.
Fransıa Qazaqstan ekonomıkasyna negizgi ınvestorlardyń biri bolyp tabylady. Óz kezeginde, Qazaqstan Fransıanyń Ortalyq Azıadaǵy eń iri saýda-ekonomıkalyq áriptesi bolyp tabylady.
9.2021-2030 jyldarǵa arnalǵan ekijaqty ekonomıkalyq «Jol kartasynyń» maqsattaryn eske sala otyryp, Prezıdentter energetıka, atom energetıkasy jáne ónerkásip, sondaı-aq qol qoıylǵan deklarasıaǵa sáıkes strategıalyq paıdaly qazbalar salasyndaǵy yntymaqtastyq pen saýdany damytýǵa da ýaǵdalasty.
Olar aýyl sharýashylyǵy salasyndaǵy tyǵyz yntymaqtastyqty damytýǵa ýaǵdalasty.
10.Memleket basshylary eki eldiń bilim berý jáne zertteý ortalyqtary men aýrýhanalary arasynda onkologıa, telemedısına, ońaltý jáne psıhomotorıka, sondaı-aq reprodýktıvti densaýlyq salasyndaǵy áriptestik baılanystardyń nyǵaıýyn atap ótip, densaýlyq saqtaý salasyndaǵy yntymaqtastyqtyń damýyn quptady.
11.Prezıdentter joǵary bilim salasyndaǵy yntymaqtastyqtyń basymdylyǵyn atap ótti. Osy oraıda, «Abaı-Vern» ekijaqty baǵdarlamasy aıasynda grant sanyn ulǵaıtý jáne «Bolashaq» baǵdarlamasyna qatysatyn fransýz ýnıversıtetteriniń tizimin keńeıtý esebinen qazaq stýdentteriniń Fransıada bilim alýyn arttyrýdy quptady. Taraptar Qazaqstanda Qazaq-fransýz ýnıversıtetin qurý jumysyn jalǵastyrady. 2023 jylǵy 1-3 qarashada Almaty qalasynda Qazaqstan-Fransıa joǵary oqý oryndarynyń VIII Halyqaralyq forýmynyń ótýin quptady.
12.Prezıdentter Qazaqstanda fransýz tilin oqytýdy damytý qajettigin atap ótip, Qazaqstanda fransýz oqý oryndaryn ashý jáne qazaq mektepterinde fransýz tilin oqytý týraly úkimetaralyq kelisimge qol qoıýdy quptady. Kadrlar daıarlaý jáne kásibı bilim berý salasyndaǵy yntymaqtastyqty oń baǵalady.
13.Prezıdentter Parıj qalasyndaǵy Fransıanyń Shyǵys tilderi men órkenıetteri ulttyq ınstıtýtynda (INALCO) qazaq tilin oqytýdy qaıta jandandyrýdy quptap, qazaq tili men mádenıetin ilgeriletý jónindegi INALCO-nyń aldaǵy josparlaryna qoldaý bildirdi.
14.Prezıdentter Qazaqstan men Fransıa arasyndaǵy mádenı saladaǵy ekijaqty baılanystardy jandandyrýǵa ózara nıetterin rastady. Eki eldiń mádenı mekemeleri arasyndaǵy yntymaqtastyq pen tájirıbe almasýdy nyǵaıtýǵa baǵyttalǵan jobalardy oń baǵalap, Parıjde Qazaqstan Respýblıkasynyń Ulttyq kórmesin ótkizý ıdeıasyn quptady.
15.Taraptar týrızm jáne adamı qatynastardy odan ári damytý salasyndaǵy yntymaqtastyqqa ózara qyzyǵýshylyq bildirdi.
16.Memleket basshylary sport salasyndaǵy baılanystardyń jandanýyn quptady. Qazaqstan Respýblıkasynyń Prezıdenti Fransýz Respýblıkasynyń Prezıdentine 2024 jyly Parıjde ótetin HHHİİİ jazǵy Olımpıada jáne Paralımpıada oıyndaryn uıymdastyrýda tabys tiledi.