Prezıdentke tapsyrmalarynyń oryndalý barysy týraly málimet berildi.
Búgin Memleket basshysy Qasym-Jomart Toqaev Mádenıet jáne sport mınıstri Asqat Oralovty qabyldady, dep habarlaıdy Almaty-akshamy.kz
Mınıstrliktiń mádenıet, sport jáne týrızm ındýstrıasyn damytýǵa baǵyttalǵan bastamalary tanystyryldy.
Memleket basshysyna Almaty oblysynda sportshylardy olımpıadaǵa daıarlaıtyn respýblıkalyq bazanyń qurylysy týraly baıandaldy. Nysan bıyl paıdalanýǵa beriledi dep josparlanyp otyr. 2025 jylǵa deıin jalpy 113 sport nysany salynady. Sonymen qatar mınıstr Dene shynyqtyrý men sportty damytýdyń 2023-2029 jyldarǵa arnalǵan tujyrymdamasynyń jobasy týraly aıtty.
Budan bólek, Prezıdentke qazaqstandyq sportshylardyń aldaǵy jazda ótetin Azıa, Olımpıada oıyndaryna daıyndyǵy jáne 2024 jyly elimizde V Dúnıejúzilik kóshpendiler oıyndaryn uıymdastyrý jumystary týraly baıandaldy.
Qasym-Jomart Toqaevtyń tapsyrmasy boıynsha 2025 jylǵa deıin mádenıet jáne muraǵat uıymdary qyzmetkerleriniń jalaqysy kezeń-kezeńmen ósedi.
Mınıstrlik otandyq avtorlardyń teatrdaǵy qoıylymdarynyń sanyn arttyrýdy jáne qazaqstandyq fılmder túsirýdi josparlap otyr. Bıyl alǵash ret jas jazýshylar men aqyndarǵa arnalǵan ádebı syılyq tabystalady. Jeti respýblıkalyq mádenıet uıymyna «ulttyq» mártebe berý máselesi pysyqtalyp jatyr.
Asqat Oralovtyń aıtýynsha, týrızm salasyn damytý maqsatynda Kids Go Free baǵdarlamasyna qatysý úshin týroperatorlarǵa qoıylatyn talaptar jeńildetilgen. Sondaı-aq qazaqstandyqtar úshin týrısik keshbek engizý josparlanyp otyr.
Memleket basshysy ishki jáne syrtqy týrızmdi odan ári yntalandyrý, ınvestısıa tartý sharalaryn qabyldaýdy tapsyrdy. Prezıdent buqaralyq sportqa qoldaý kórsetý jáne sport ınfraqurylymyn qoljetimdi etý qajet ekenin atap ótti. Sondaı-aq álemdik deńgeıdegi básekege qabiletti mádenıetti damytý úshin jaǵdaı jasaýdyń jáne elimizdegi kreatıvti ındýstrıalar bazasyn qalyptastyrýdyń mańyzdylyǵyna nazar aýdardy.