Prezıdent Qasym-Jomart Toqaev Konstıtýsıalyq komısıa tóraǵasy – Konstıtýsıalyq sot tóraǵasy Elvıra Ázimovany, Konstıtýsıalyq komısıa tóraǵasynyń orynbasary – Memlekettik keńesshi Erlan Qarındi jáne Konstıtýsıalyq komısıa múshesi – Prezıdenttiń quqyqtyq máseleler jónindegi kómekshisi Erjan Jıenbaevty qabyldady, dep habarlaıdy Aqshamnews.kz tilshisi Aqordanyń baspasóz qyzmetine silteme jasap.
Ázimova prezıdentke Konstıtýsıalyq komısıanyń buǵan deıin ótken otyrystarynyń nátıjesi týraly málimet bergen. Elvıra Ázimova Komısıa qyzmetiniń ashyqtyǵyn qamtamasyz etý maqsatynda barlyq otyrys medıa keńistikte, sonyń ishinde arnaıy telegramm arnalary arqyly tikeleı kórsetilip jatqanyn baıandady.
"Konstıtýsıalyq komısıa tóraǵasy jarty jyl boıy Konstıtýsıalyq reformalardy qoǵamdyq talqylaý ótkenin aıtty. Elektrondy platformaǵa azamattardan, quqyqtanýshy ǵalymdardan, sarapshylardan, zańgerlerden, saıası partıalardan, úkimettik emes uıymdardan, kásiptik jáne bıznes qaýymdastyqtardan 2 myńnan asa usynys pen bastama kelip túsken", - dep habarlaıdy Aqorda.
Osyǵan deıingi otyrystarda Komısıa músheleri Konstıtýsıa preambýlasynyń túbegeıli jańa redaksıasyn, birqatar baptardy jáne bólimderdi ázirlep, qarastyrdy.
Memleket basshysy aldaǵy Konstıtýsıalyq reforma elimizdiń damýyna tyń serpin beretinin atap ótti. Al Komısıa jumysy Konstıtýsıalyq reformalardy iske asyrýda óte mańyzdy ról atqaratynyn jetkizdi.