UQK Cybaılas jemqorlyqqa qarsy is-qımyl qyzmeti sybaılas jemqorlyq qylmystaryn anyqtaý jáne jolyn kesý boıynsha jumysty jalǵastyrady, - dep habarlaıdy Aqshamnews.kz.
Qazirgi ýaqytta Shyǵys Qazaqstan oblysynyń Jolaýshylar kóligi jáne avtomobıl joldary basqarmasynyń basshysy para aldy jáne laýazymdyq ókilettikterdi teris paıdalandy degen kúdikpen ustaldy.
Onyń jol qurylys kompanıalary jáne avtobýs parkteriniń ókilderinen 134 mln teńge somasyna zańsyz syıaqy alǵany anyqtaldy.
Tintý barysynda turǵyn úıinen 121,9 mln teńge jáne 97,7 myń dollar tárkilengen.
Sondaı-aq osy óńirdiń Bilim salasynda sapany qamtamasyz etý Departamentiniń basshysyna qatysty qylmystyq is qozǵaldy.
Ol muǵalimderdiń memlekettik atestattaýdan ótýine járdemdeskeni úshin júıeli túrde aqshalaı qarajat alǵan.
Sot sanksıasymen kórsetilgen adamdar qamaýǵa alyndy.
Qylmystyq-prosestik kodekstiń 201-babyna sáıkes ózge aqparat jarıa etýge jatpaıdy.