Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna joldaýynda fýtbol klýbtaryn jekeshelendirý qajetin aıtty, - dep habarlaıdy Aqshamnews.kz tilshisi.
"Barshańyzǵa málim, men buqaralyq sportty damytýǵa basa mán beremin. Aımaqtarda sport nysandary boı kóterip jatyr. Úıirmeler balalarǵa qoljetimdi bola bastady. Erekshe qajettiligi bar azamattarǵa jáne egde adamdarǵa arnalǵan sport klýbtary ashylyp jatyr. Sondaı-aq kásibı sport salasynda oń ózgerister bolyp jatyr. Men buǵan deıin shetelden kelgen sportshylarǵa búdjetten qarjy bólýdi shekteý týraly tapsyrma berdim. Depýtattar bul bastamany qoldap, arnaıy zań qabyldady. Bul – óz sportshylarymyzdy qoldaýǵa arnalǵan mańyzdy qadam. Biraq munymen shektelip qalýǵa bolmaıdy, alǵa qaraı júrýimiz kerek. Fýtbol klýbtaryn jekeshelendirýge qatysty jumysty tezdetý kerek",- dedi Prezıdent.
Memleket basshysy qazir elimizdiń tórt fýtbol klýbyna ıe belgili kásipkerlerdiń klýbtary jekemenshikke ótip jatqanyn aıtty. Sol úshin olarǵa rızashylyǵyn bildirdi.
"Degenmen fýtboldy komersıalandyrý isin jalǵastyra berý kerek. Mundaı qadamsyz Qazaqstanda fýtbol damymaıtynyn álemdik tájirıbeden kórip otyrmyz. Qazirgi zamanda kásibı sportty qomaqty tabys ákeletin bıznes-ındýstrıa retinde qarastyrǵan jón", - dep naqtylady Memleket basshysy.