Tıisti júk tasymaly aǵynyn qalyptastyrý úshin kúsh jumyldyrý mańyzdy
Memleket basshysy Qasym-Jomart Toqaev Máskeýdegi Joǵary Eýrazıalyq ekonomıkalyq keńes otyrysyndaǵy sózinde ıntegrasıalyq damýdyń taǵy bir mańyzdy baǵyty jańa halyqaralyq kólik arterıalaryn qurý bolýy múmkin ekenin aıtty, dep habarlaıdy Zakon.kz.
"Bizdiń ekonomıkalyq odaq, saıyp kelgende, Eýropa men Azıa, jahandyq Ońtústik pen Soltústik arasyndaǵy baılanystyrýshy býynǵa aınalatyndyǵyna senimdimin. Biz Reseı Federasıasynyń QHR, Úndistan, Pákistan, Iran, Taıaý Shyǵys jáne Ońtústik-SHyǵys Azıa memleketteri baǵytynda dálizderdi qalyptastyrý jónindegi nıetterin quptaımyz. Transkaspıı baǵytymen ushtastyra otyryp, Soltústik – Ońtústik kólik dálizin damytý qajettiligi týraly oı-paıym ábden-pisip jetildi dep sanaımyn", - dedi QR Prezıdenti Qasym-Jomart Toqaev.
Memleket basshysy osy rette Qazaqstan óziniń barlyq múmkindikteri men resýrstaryn jumyldyra otyryp, EAEO-nyń senimdi logıstıkalyq haby bolatynyn basa atap ótti. Sondaı-aq ol úlgili bastama retinde "Chelábınsk-Bolashaq-Iran" temirjol magıstrali boıynsha júrdek júk poıyzdaryn iske qosýdy usynatyndyqtaryn jetkizdi.
"Bul úshin Chelábınskide júk jınaqtaıtyn ortalyq asha otyryp, "Soltústik – Ońtústik" kólik dáliziniń qoldanystaǵy ınfraqurylymyn paıdalanýǵa bolady. Biz ózimizdiń Beıneý – Mańǵystaý temir jol jelisindegi jáne Beıneý – Shalqar avtomobıl jolyndaǵy talapqa saı kelmeıtin ýchaskelerdi qaıta salýǵa ázirmiz. Tıisti júk tasymaly aǵynyn qalyptastyrý úshin kúsh jumyldyrý mańyzdy. Sol sebepti Qazaqstan muny sózsiz iske asyrady", - dedi Toqaev.
Prezıdenttiń aıtýynsha, Baqty – Aıagóz temir jolynyń qurylysyn ózara tıimdi yntymaqtastyǵymyzdyń naqty mysaly deýge bolady. Onyń iske qosylýy Qazaqstannyń da, Reseıdiń de Qytaı baǵytyna jóneltetin júk kólemin aıtarlyqtaı arttyrýǵa múmkindik beredi.