Memleket basshysy Ázirbaıjan Prezıdenti Ilham Álıevpen kezdesti. Prezıdent óziniń jýyrda Bakýge jasaǵan sapary qazaq-ázirbaıjan qarym-qatynasyn jańa deńgeıge kótergenin atap ótti, dep habarlaıdy Almaty-akshamy.kz Aqordaǵa silteme jasap.
– Elimizge kelip, samıtke qatysqanyńyz úshin alǵys aıtamyn. Ekijaqty qarym-qatynasqa arnaıy toqtalǵym keledi. Bakýge saparym kezinde kórsetken qonaqjaılyǵyńyzǵa rızashylyǵymdy bildiremin. Bizdiń kelissózderimiz tabysty boldy jáne shet memleketterdegi saıası jáne ekonomıkalyq toptardyń nazaryn aýdardy. Biz Ázirbaıjandy odaqtasymyz, strategıalyq seriktesimiz dep esepteımiz. Árqashan osy baǵytty ustanamyz, – dedi Qasym-Jomart Toqaev.
Qazaqstan men Ázirbaıjan prezıdentteri qol jetkizilgen ýaǵdalastyqtardy sapaly júzege asyrý úshin barlyq qajetti sharalardy qabyldaý jóninde úkimetterge tapsyrma berilgenin atap ótti.
– Ázirbaıjan óz aımaǵynda ǵana emes, keń geografıalyq aýqymda da mańyzdy ról atqarady. Qazir kún tártibinde «Orta dálizdi» damytý máselesi tur. Biz de osy formattaǵy jumystardy jalǵastyrýǵa múddelimiz, – dedi Memleket basshysy.
Sonymen qatar prezıdentter eki eldiń mádenı-gýmanıtarlyq saladaǵy ózara tabysty is-áreketin, onyń ishinde Qazaqstan men Ázerbaıjannyń tarıhı jáne mádenı qundylyqtaryn ilgeriletýge baǵyttalǵan birqatar birlesken jobanyń júzege asyrylýyn joǵary baǵalady.
– Biz Ázirbaıjannyń kórnekti memleket qaıratkeri Geıdar Álıev atyndaǵy kósheni aýystyrý týraly aıttyq. Elordamyzda oǵan laıyqty oryn bar dep sanaımyn. Mundaı oryn tabyldy. Men ony maquldadym. Endigi másele ýaqyttyń enshisinde, – dedi Qazaqstan Prezıdenti.
Ilham Álıev AÓSSHK samıtine shaqyrǵany jáne qazaq halqynyń dástúrli qonaqjaılyǵy úshin Qasym-Jomart Toqaevqa alǵysyn aıtty.
– Baýyrlas Qazaqstanǵa kelgenime óte qýanyshtymyn. Sondaı-aq ótkizilgen samıttiń oń nátıjelerimen quttyqtaǵym keledi. Bul Qazaqstannyń halyqaralyq arenadaǵy róli men bedeli joǵary ekenin kórsetedi. Eń aldymen, Geıdar Álıuly Álıevti eske alyp, qurmet kórsetkenińiz úshin alǵys aıtqym keledi. Sizdiń saparyńyzdan beri biz jaqsy jetistikter men nátıjelerge qol jetkizdik, – dedi Ázirbaıjan Prezıdenti.
Sonymen qatar kezdesý barysynda memleketter basshylary ekijaqty yntymaqtastyqtyń basym baǵyttary men halyqaralyq kún tártibindegi ózekti máselelerdi talqylady.