Memleket basshysy Qasym-Jomart Toqaev Aqmola oblysynyń Zerendi aýdanynda aımaq sharýalarymen egin jınaý naýqanyna arnalǵan keńes ótkizdi. İs-sharaǵa Qostanaı, Pavlodar jáne Soltústik Qazaqstan oblysynyń dıqandary beınebaılanys rejıminde qatysty.
Prezıdent Aqmola oblysyna egin jınaý naýqanynyń barysymen tanysý úshin arnaıy kelgenin aıtty.
"Egis alqabyndaǵy jumystardy ýaqtyly aıaqtap, astyqty der kezinde jınap alý qajet. Elimizdegi azyq-túlik qaýipsizdigi, ishki naryqtyń turaqtylyǵy osy jumysqa tikeleı baılanysty. Astyq jınaý naýqanyn oıdaǵydaı júzege asyrsaq, eksporttyq áleýetimiz de myqty bolmaq, ıaǵnı shetelge mol ónim shyǵara alamyz. Byltyr elimizde aýyl sharýashylyǵy salasy úshin tabysty jyl boldy. Sharýalar tabandy eńbek etip, astyq jınaýdan rekordtyq kórsetkishke qol jetkizdi. Osynyń bári agrotehnologıany durys qoldanýdyń nátıjesi deýge bolady. Sonyń arqasynda aýyl sharýashylyǵy boıynsha ónim kóleminiń ósimi basqa salalarǵa qaraǵanda anaǵurlym artyq boldy. Bıylǵy 8 aıda atqarylǵan jumystardyń nátıjesi jaman emes. Óndiristiń tehnologıalyq áleýetin arttyrý úshin qolǵa alynǵan sharalar tıimdiligin kórsetip jatyr", – dedi Qasym-Jomart Toqaev.