Jańa tóraǵa Asqat Jumaǵalıdy tanystyrdy.
Prezıdent Sybaılas jemqorlyqqa qarsy is-qımyl agenttiginiń basshylyq quramymen beınebaılanys arqyly keńes ótkizdi, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Agenttiktiń burynǵy tóraǵasy Oljas Bektenovke atqarǵan jumysy úshin rızashylyǵyn bildirip, onyń jańa qyzmetine tabys tiledi.
Memleket basshysy Agenttiktiń jańa basshylyǵy men jeke quramyna aldaǵy kezeńge arnalǵan birqatar mindet júktedi. Prezıdenttiń aıtýynsha, Sybaılas jemqorlyqqa qarsy saıasattyń 2022-2026 jyldarǵa arnalǵan tujyrymdamasynda kórsetilgen sharalardy tolyq júzege asyrý kerek. Joǵary laýazymdy sheneýnikter arasyndaǵy, ásirese, halqymyzdyń ál-aýqatyna tikeleı áser etetin salalardaǵy jemqorlyqty anyqtaý jáne onyń jolyn kesý jónindegi qatań tásildi jalǵastyrǵan jón. Prezıdent jemqorlyqqa ıtermeleıtin júıeli sebepter men jaǵdaılardy joıý mańyzdy ekenine nazar aýdardy. Onyń aıtýynsha, aqparattyq-túsindirý jumystaryn tıisti deńgeıde júrgizý kerek.
Memleket basshysynsha aıtýynsha, tergeý jumystarynyń nátıjesinde Agenttik quny 108 mıllıard teńge kólemindegi shyǵyndy qaıtara aldy. Bul – oń nátıje. Biraq sonymen qatar bul ótken kezeńderde jemqorlyq qanshalyqty beleń alǵanyn kórsetedi.
«Jemqorlyqtyń barlyq túrimen ymyrasyz kúres – memleketimizdiń odan ári damýynyń basymdyǵy. Paraqorlyq, tamyr-tanystyq, qońyraý shalý arqyly másele sheshý jáne taǵy basqa keleńsizdikter jyldar boıy azamattardyń memlekettik ınstıtýttarǵa degen senimine selkeý túsirgenin bilesizder. Osy oraıda halyqtyń ádildikke degen úmiti azaıa bastady. Sondyqtan meniń saılaý aldynda bergen ýádelerimniń biri jemqorlyqty túbirimen joıǵansha ymyrasyz kúres júrgizý boldy. Bul iste Sybaılas jemqorlyqqa qarsy is-qımyl agenttigi sheshýshi ról atqarady. 2019 jyly maýsymda qurylǵan sátten beri atalǵan organ kóptegen jumys atqardy. Ony moıyndaý kerek. Jemqorlyqqa qarsy kúres sharalarynyń júıesi belsendi damı bastady. Atap aıtqanda, jańa quqyqtyq ınstıtýttar, ózine baǵynyshty qyzmetkerlerdiń jemqorlyq qylmysy úshin saıası jáne memlekettik tulǵalardyń qyzmetten ketýi, adaldyqqa tekseris, normatıvtik-quqyqtyq aktilerge jemqorlyqqa qarsy júrgiziletin saraptama jáne taǵy da basqa bastamalar osy sanatqa kiredi. Olardyń alǵashqy nátıjelerin kórip otyrmyz», – dedi Qasym-Jomart Toqaev.