«Aıýsaı» bógeti Úlken Almaty ózeniniń baseıninde ornalasqan.
Memleket basshysy sel tasqynynan qorǵaıtyn «Aıýsaı» bógetine bardy, dep habarlaıdy Almaty-akshamy.kz
Prezıdent Qasym-Jomart Toqaevtyń Almaty qalasyna jumys sapary bıyl 1 maýsymda paıdalanýǵa berilgen sel tasqynynan qorǵaıtyn bógetpen tanysýdan bastaldy.
«Aıýsaı» bógeti Úlken Almaty ózeniniń baseıninde ornalasqan. Onyń joǵary jaǵynda sel qaýpi bar 98 ýchaske, 89 muzdyq, 20 morenalyq jáne muzdy kól bar. Bóget sel júrý qaýpin barynsha azaıtyp, 500 myńnan astam halyq pen 2 myńǵa jýyq nysannyń tabıǵat apatynan qorǵalýyn qamtamasyz etedi.
Elimizdiń bıik taýly aımaqtarynda 970 morenalyq kól bar. Onyń ishinde 156 kólde sel júrý qaýpi joǵary.
Memleket basshysy qala turǵyndarynyń qaýipsizdigin qamtamasyz etý úshin selden qorǵaý sharalaryn júrgizý mańyzdy ekenin atap ótti. Bul rette Prezıdent Tótenshe jaǵdaılar mınıstrligi, Almaty qalasy ákimdigi jáne «Qazseldenqorǵaý» mekemesi ózara tyǵyz qarym-qatynasta jumys isteýi qajet ekenin aıtty.