Topar kentinde sibir jarasynyń oshaǵy anyqtaldy, dep habarlaıdy almaty-akshamy.kz
Topar kentinde sibir jarasynyń oshaǵy anyqtaldy. Jeke aýlada qojaıyndary 8 aılyq buqany soıýǵa májbúr bolǵan. Mal ıeleriniń aıtýynsha, mal aýrý kúıde bolǵan, etin satýdy josparlamaǵan. Sol aýladaǵy úsh adamnan sibir jarasy anyqtaldy, taǵy eki adam dárigerler baqylaýynda. Sondaı-aq, olarmen baılanysta bolǵan 30 adam anyqtalyp, olarmen profılaktıkalyq is-sharalar týraly túsindirme áńgime júrgizilip, medısınalyq baqylaý ornatyldy.
Májbúrlikten soıylǵan maldyń eti tárkilenip, mórlenip, veterınarıalyq zańnamaǵa sáıkes joıylatyn bolady.Kentte indetti oqshaýlaý jáne joıý úshin barlyq qajetti sanıtarlyq-veterınarlyq epızootıaǵa jáne epıdemıaǵa qarsy is-sharalar júrgizilýde. Barlyq tekserilgen oshaqtarda dezınfeksıa júrgizildi, veterınarıa mamandary úılerdi aralap, maldardy klınıkalyq tekserý jáne termometrıamen májbúrli egý jumystaryn júrgizýde. Aýyl sharýashylyǵy mınıstrligi Veterınarıalyq baqylaý jáne qadaǵalaý komıteti arqyly veterınarıalyq preparattardyń respýblıkalyq qorynan vaksınalar men dezınfeksıalyq quraldarmen tolyq qamtamasyz etti.
Kentke Abaı qalasynan kire beriste kólikterdi sanıtarlyq óńdeýden ótkizý úshin beket ornatyldy. Karantındik sharalardy saqtaý úshin Jartas kentinen Topar kentine ekinshi kireberis ýaqytsha jabyldy.Turǵyndardyń qozǵalysyna shekteý qoıylǵan joq. Sondaı-aq kentten mal áketýge jáne ákelýge, ony sharýashylyqtar ishinde saýdalaýǵa, aýrý maldyń sútin paıdalanýǵa, mal soıýǵa jáne sol aýmaqtan jem men jemshóp qospalaryn paıdalanýǵa tyıym salyndy.
Jaǵdaı ýákiletti qyzmetterdiń tolyq baqylaýynda. Oqıǵa ornynda sanıtarlyq-epıdemıologıalyq baqylaý, densaýlyq saqtaý, veterınarıalyq baqylaý komıtetiniń aýmaqtyq ınspeksıasy men veterınarıa basqarmasynyń, respýblıkalyq epızootıaǵa qarsy toptyń bir top qyzmetkerleri jumys isteýde.