4 qarashada Parıjde Qazaqstan Respýblıkasynyń Prezıdenti Qasym-Jomart Toqaevtyń Fransıaǵa memlekettik sapary aıasynda Qazaqstan-Fransıa iskerlik keńesiniń 13-otyrysy ótti.
Bul is-sharaǵa sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev bastaǵan QR Sıfrlyq damý mınıstrliginiń delegasıasy qatysty, dep habarlaıdy aqshamnews.kz sala mınıstrligine silteme jasap.
Keńes Qazaqstan men Fransıa kompanıalary arasyndaǵy baılanystardy ornatýǵa jáne nyǵaıtýǵa yqpal etedi. Bul eki eldiń bıznesterine jańa seriktester tabýǵa, saýda jáne ekonomıkalyq qatynastardy keńeıtýge, sondaı-aq iskerlik qaýymdastyq ókilderi arasyndaǵy senimdi arttyrýǵa kómektesedi.
İs-sharada Jaslan Mádıev sóz sóılep, sıfrlandyrý salasyndaǵy negizgi jetistikterdi atap ótti, sonyń ishinde ınovasıalyq ekojúıelerdi, Govtech jáne startap jobalaryn damytý, sondaı-aq jasandy ıntellektti barlyq salaǵa engizý týraly aıtty.
Qazaqstanda 20 mıllıon adam turady, olardyń ortasha jasy – 32 jas, bul ınovasıalarǵa daıyn, serpindi halyqty bildiredi. Bizdiń el jer kólemi boıynsha álemde toǵyzynshy orynda jáne Ortalyq Azıanyń jalpy JİÓ-niń shamamen 60%-yn quraıdy.
«Bul kórsetkishti 200 000-nan astam mamandy qamtıtyn jáne jyl saıyn 40 000-ǵa jýyq IT-túlek daıyndaıtyn damyp kele jatqan IT-sektorymyz qamtamasyz etedi. Qazaqstan sondaı-aq álemdegi eń kóne jáne iri ǵarysh aılaǵynyń otany bolyp tabylady, bul tehnologıalyq progreske degen umtylysymyzdy aıqyndaıdy. Osyndaı myqty negizdiń arqasynda biz sıfrlyq dáýirdiń synaqtary men múmkindikterine daıynbyz», – dep atap ótti Jaslan Mádıev.
Mınıstrdiń aıtýynsha, Qazaqstan startaptardy qoldaý úshin jan-jaqty jáne ınovasıalyq ınfraqurylym qurdy. Bul ekojúıeniń ortalyǵynda Ortalyq Azıanyń jetekshi tehnoparki – Astana Hub ornalasqan. Búginde Astana Hub quramynda 1500-den astam kompanıa-rezıdent bar, onyń ishinde 400-den astam halyqaralyq kompanıalar jumys isteýde, bul bizdiń jahandyq ınovasıalarǵa ashyq saıasatymyzdy kórsetedi. Sońǵy bes jylda Astana Hub qatysýshylary shamamen 555 mıllıon dollar ınvestısıa tartyp, 1,9 mıllıard dollar tabys tapty, bul bizdiń ekojúıemizdiń joǵary áleýetin aıqyndaıdy. Bizdiń jyl saıynǵy IT-eksport kólemi qazir shamamen 500 mıllıon dollardan asty, bul bizdiń tehnologıalyq sektorymyzdyń jahandyq básekege qabilettiligin kórsetedi.
İs-shara aıasynda Qazaqstannyń sıfrlyq damý, ınovasıalar jáne aeroǵarysh ónerkásibi mınıstrligi men NSDS Digital Investments arasynda Qazaqstanda jáne Ortalyq Azıada sıfrlyq jáne jasandy ıntellekt bilimin damytý maqsatynda strategıalyq seriktestik týraly memorandýmǵa qol qoıyldy. Memorandýmǵa sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev pen NSDS Digital Investments-tiń teń quryltaıshysy Nıkolá Sadırak qol qoıdy.
Astana Hub basty seriktes rólin atqaratyn bul yntymaqtastyq 01Edu platformasy negizinde ınovasıalyq baǵdarlamalaý mektepteri jelisi – Tomorrow School-dy damytýǵa, jasandy ıntellekt boıynsha ınovasıalyq oqý baǵdarlamasyn qurýǵa, qazaqstandyq talanttardy halyqaralyq arenada ilgeriletýge, sondaı-aq eki taraptyń ártúrli is-sharalarǵa qatysýyna jáne bilim almasýǵa baǵyttalǵan.
Tomorrow School – Astana Hub usynǵan Qazaqstandaǵy alǵashqy peer-to-peer formatyndaǵy jasandy ıntellekt mektebi, ol 01Edu platformasynda eksklúzıvti túrde jumys isteıdi. Tomorrow School baǵdarlamalaý boıynsha bastapqy daıyndyqty talap etpeı-aq, AI salasynda tegin bilim alýǵa erekshe múmkindik beredi.
Bul joba Ulttyq jasandy ıntellekt ortalyǵyn qurýdyń bir bóligi bolyp tabylady.
«Alem.AI ulttyq II ortalyǵy ınovasıalardyń katalızatory bolady, jylyna 100-ge deıin startaptardy iske qosýǵa qabiletti jáne Qazaqstandy jasandy ıntellektti damytý men qoldaný salasyndaǵy kóshbasshy retinde qoldaıdy», – dep túıindedi Sıfrlyq damý mınıstri.