Almaty qalasynyń Óńirlik komýnıkasıalar qyzmetiniń alańynda qalalyq máslıhat depýtaty Tóleýǵalı Taıtóleev Memleket basshysynyń tapsyrmasymen máslıhat jergilikti ózin-ózi basqarýdyń negizgi tizbegi bolatyny týraly aıtyp, ózekti saýaldarǵa jaýap berdi, dep habarlaıdy Almaty-akshamy.kz Almaty qalasynyń Óńirlik komýnıkasıalar qyzmetine silteme jasap.
- Tóleýǵalı Muhamedjanuly, ózińizge belgili, Prezıdent memleket pen jergilikti ózin-ózi basqarý ınstıtýttary fýnksıalarynyń arajigin tıimdi ajyratý qajettigin atap ótti. Osyǵan baılanysty qala máslıhatynyń jumysynda qandaı ózgerister kútilýde?
- Iá, qazirgi tańda máslıhat depýtattary Memleket basshysy usynatyn qala ákimi laýazymyna kem degende eki kandıdatýrany balamaly negizde usyný quqyǵyn retteıtin zańnamalarǵa túzetýler engizildi. Osylaısha, Prezıdent oblys jáne respýblıkalyq mańyzy bar qala ákimderin máslıhattarda qaraý nátıjesin eskerip taǵaıyndaıdy. Bul – óńir basshylary janama saılaý arqyly qyzmetke keledi degen sóz. Biraq, Memleket basshysynyń aımaq basshylaryn máslıhattardyń kelisiminsiz ornynan bosatý quqyǵy saqtalady. Ókildi bılik tarmaǵyn ózgertý jónindegi bul jańashyldyqtardyń bári parlamenttik mádenıeti joǵary jáne yqpaldy halyq qalaýlylary bar Jańa Qazaqstandy qurýǵa baǵyttalǵan. Búkilhalyqtyq referendým nátıjesinde qabyldanǵan Konstıtýsıalyq reformar sheńberinde jergilikti ókildi organdardyń jumysy birqatar baǵyttar boıynsha jetildiriledi.
Atap aıtsaq, máslıhattardyń derbestigi men halyq múddesi jolyndaǵy jumysynyń tıimdiligin arttyrý maqsatynda máslıhat tóraǵasy laýazymy engizilitin bolady. Sondaı-aq «Qazaqstandaǵy jergilikti ózin-ózi basqarý týraly» jeke zań ázirlenýde (memlekettik basqarý jáne jergilikti basqarý boıynsha eki zań qabyldanbaq). Osy rette prosesterdi búrokratıadan aryltý jáne memlekettik organdar men máslıhattardyń tıimdiligin artyrý kózdelgen.
Ózderińizge málim, máslıhat depýtattarynyń 50 paıyzy turǵyndardyń tikeleı daýys berýimen saılanatyn bolady. Bul halyq qalaýlylarynyń jaýapkershiligin aıtarlyqtaı arttyratyny sózsiz. Atalmysh ózgerister Konstıtýsıalyq reformalar aıasynda iske asady. Sondaı-aq oblys ákimderi partıa tóraǵasy bolyp taǵaıyndalmaıdy, bul saıası partıalardyń básekesin ózara kúsheıtedi.
- Al máslıhattarǵa qandaı ókilettikter beriledi? Olar alatyn jańa múmkindikter týraly aıtyp berseńiz.
- QR «Almaty qalasynyń erekshe mártebesi týraly» zańyna ózgerister men tolyqtyrýlar engizildi, aǵymdaǵy jyldyń qyrkúıek aıynan engizilgen tolyqtyrýlar zańdy kúshine enedi.
Atalǵan zańda máslıhatqa buryn bolmaǵan ókilettikter berildi. Mysaly:
- Almaty qalasynyń dızaın-kodyn bekitý;
- Jyljymaıtyn múlikti resimdeý máselelerin qaraý jónindegi komısıany qurý, onyń quramyn jáne ol týraly erejeni bekitý;
- Almaty qalasynda syrtqy jaryqtandyrý júıelerin paıdalaný qaǵıdalaryn bekitý;
- Menshik ıeleriniń kelisimi bolǵan kezde azamattar kóp jınalatyn oryndarda beınekameralar ornatý jáne beınebaıqaý monıtorıńin júrgizý qaǵıdalaryn, qoǵamdyq tártipti qorǵaý jáne aqparattandyrý salalaryndaǵy ýákiletti organdarmen kelisý boıynsha bekitýge quqyly.
- Bıylǵy jyly Almaty máslıhaty óz qyzmetinde qandaı baǵyttarǵa basa nazar aýdaratyn bolady?
- Máslıhat jyl sońyna deıin óz qyzmetinde birneshe baǵyttar men basymdyqtarǵa nazar aýdaratyn bolady. Almatyny 2025 jylǵa deıingi damytý baǵdarlamasy qazir ázirlenýde, halyqtyq talqylaýǵa usynylǵan bolatyn. Búkil ózekti usynystar eskerilip, qamtylǵannan keıin, bul baǵdarlamany depýtattar qarastyryp, pysyqtaıtyn bolady. Baǵdarlamany qabyldaǵannan keıin, ony jan-jaqty iske asyrýǵa den qoıatyn bolamyz. Sonymen qatar, qoǵamdaǵy jáne qala damýyndaǵy ózekti máseleler boıynsha depýtattyq bastamalar kóterip, tıisti erejeler men sheshimder qabyldanady. Búdjettiń oılastyrylǵan jáne tereń saraptalǵan negizde qalyptastyrylýy kózdelgen.
Bıylǵy jyly el kóleminde alǵash ret Almaty qalasynda búdjet jobasy ákimdiktiń búdjettik komısıasynan buryn máslıhattyń salalyq komısıalarynyń qaraýynan ótedi. Turǵyndardyń asa shuǵyl jáne ózekti problemalaryn sheshýge den qoıylady. İri ınfraqurylymdyq jáne ózge de aýqymdy problemalar boıynsha máslıhat komısıalarynyń kóshpeli jıyndaryn ótkiziledi. Medıa keńistikte, ınternette jáne áleýmettik jelilerdegi jumystyń qarqynyn arttyryp, máslıhattyń qoǵamdyq qabyldaýynda azamattardy qabyldaý kólemin arttyrýǵa basymdyq beriledi. Depýtattar jumysynyń tıimdiligin arttyrýǵa udaıy kóńil bólinedi.
Jyldyń sońyna deıin Qazaqstan Respýblıkasy zańdaryna ózgerister men tolyqtyrýlar engiziledi, soǵan sáıkes, zańǵa táýeldi normatıvtik quqyqtyq aktiler qabyldaımyz, onyń ústinen Almaty qalasy máslıhatynyń «Almaty qalasynyń 2023-2025 jyldarǵa arnalǵan búdjeti týraly» sheshiminiń jobasyn qarap, sesıada bekitý qajet.
- Ýaqytyńyzdy bólip, saýaldarǵa jaýap bergenińiz úshin alǵysymyzdy bildiremiz!