Memlekettik kirister komıteti (MKK) sońǵy kúnderi qoǵamda qyzý pikirtalas týdyrǵan “toıǵa salyq salyna ma?” degen máselege resmı túsinikteme berdi, dep habarlaıdy aqshamnews.kz.
Komıtettiń málimdeýinshe, áńgime toı ıeleri týraly emes, toı qyzmetine baılanysty tabys taýyp júrgen azamattardyń salyq mindettemeleri jaıynda bolyp otyr.
MKK málimetinshe, bul másele – jeke kásipker retinde resmı tirkelmeı, saýda-sattyqpen nemese basqa da komersıalyq qyzmettermen aınalysatyn tulǵalarǵa qatysty. Iaǵnı, toıda qyzmet kórsetip, biraq salyq tólemeıtin júrgizýshiler, fotograftar, tamadalar, ánshiler men basqa da azamattar týraly sóz qozǵalyp otyr.
Komıtet jeke tulǵalardyń salyq mindettemelerin oryndaý boıynsha salyqtyq ákimshilendirýdi olardyń qyzmetine qaramastan únemi júrgizip otyrady, – delingen resmı jaýapta.
Sondaı-aq, salyqtyq ádilettilik qaǵıdatyna saı, tabys tapqan kez kelgen adam men kásipker jalpy negizde salyq tóleýge mindetti. Bul rette «kameraldy baqylaý salyq salýǵa jatatyn tabys alatyn barlyq tulǵalarǵa qatysty birdeı túrde júrgiziledi», – dep atap ótti Memlekettik kirister komıteti.
Osylaısha, vedomstvo qoǵamda taraǵan «toı jasaǵandarǵa jeke salyq salynady» degen aqparatty joqqa shyǵaryp, basty maqsat – kóleńkeli ekonomıkamen kúres jáne tabysty jasyrmaı, salyqtyq mindettemeni oryndaý ekenin naqtylady.