Endi toı-tomalaq pen jerleý rásiminde ysyrapshyldyqqa jol bergender aıyppul arqalaýy múmkin, dep habarlaıdy aqshamnews.kz
Bul zań qudaı qosqan kórshi Qyrǵyz Respýblıkasynda qabyldanbaq. Shekaralas eldiń Parlamenti salt-dástúr joralǵylaryn, rásimder men merekelerdi ótkizý kezinde artyq shyǵyndy shekteý joldaryn usynyp jatqanyn jazypty. Zań talaptaryn buzǵany úshin toı, shara ıesine jáne mekeme ıesine aıyppul salý kózdelgen deıdi. Zań jobasy qazir qoǵamdyq talqylaýda eken. Onda otbasylyq is-sharalardy retteý úshin mynadaı sharalar usynylypty:
jerleý kezinde usaq maldy, jylqy nemese iri qara maldy soıýǵa jol berilmeıdi;
marqumdy jerlegen soń úsh kúnnen keıin bir jylqy nemese iri qara mal soıyp, Quran oqyp, as berýge ruqsat etiledi;
3 kún, 7 kún, 40 kúndigi jáne jyldyq asyn ótkizýge tyıym salynady;
toıǵa sany 250-den aspaıtyn adam shaqyrýǵa jáne bir sıyr nemese jylqy soıýǵa ruqsat etiledi;
«qyz uzatýǵa» bir sıyr nemese jylqy soıyp, 100 adamnan artyq shaqyrýǵa bolmaıdy;
úılený toıy men qyz uzatýdy birge ótkizý kezinde bir sıyr nemese jylqy soıyp, 350-den aspaıtyn adam shaqyrýǵa ruqsat etiledi;
úılený kortejinde úsh kólikten artyq bolmaýy kerek;
joǵaryda atalǵan salt-joralardy, merekelerdi jáne salt-dástúrlerdi ótkizý kezinde «kıit kıgizý», «sebet tartý» sekildi basqa da osyǵan uqsas ǵuryptarǵa qajetsiz shyǵyn shyǵarýǵa tyıym salynady.
Osy qujatqa bastamashy bolǵandar keıingi kezde elde toı-tomalaq pen jerleý rásimderine baılanysty halyqtyń tól ádet-ǵurpy men salt-dástúrine sáıkes kelmeıtin keleńsiz qubylystar kóbeıip ketkenin alǵa tartyp, osynyń barlyǵy otbasy búdjetine aýyr salmaq salyp jatyr degen. Zań jobasy qabyldana ma, joq pa — ony ýaqytynda kóremiz.