Mádenıet jáne sport mınıstrligi elimizdegi eń tanymal degen 5 ulttyq sport túrlerin jarıalady, dep habarlaıdy Almaty-akshamy.kz
1-oryn. Toǵyzqumalaq
Elimizde ulttyq sport túrleriniń ishindegi eń tanymaly – toǵyzqumalaq.
Adamnyń oılaý qabiletin damytyp, tapqyrlyqqa tárbıeleıtin zıatkerlik oıyn jas ereksheligine qaramastan jalpyǵa qoljetimdi. Qazaqstanda 6 856 toǵyzqumalaq oıyny úıirmesi bar. Oǵan 207 myńǵa jýyq adam turaqty túrde qatysady.
2-oryn. Qazaqsha kúres
Halyq arasynda qashanda sporttyń jekpe-jek túrleri óte tanymal. Sonyń ishinde qazaqsha kúres qatysýshylar sany men jankúıerleri boıynsha aldyńǵy qatarda. Búginde elimiz boıynsha 4 427 qazaqsha kúres úıirmesi jumys isteıdi. Onda 159 myńǵa jýyq adam ulttyq sport túrimen júıeli túrde shuǵyldanady.
3-oryn. Kókpar
Kórermeni boıynsha da, qatysýshylar sany jaǵynan da kókpar kósh basyndaǵy ulttyq sport túriniń biri. Elimizde 78 myńnan astam adam kókpar sportymen aınalysady. Olardy jattyqtyryp, sheberlikterin shyńdaıtyn 916 úıirme bar.
4-oryn. Asyq atý
Asyq atý – erteden kele jatqan qazaqtyń ulttyq oıyny. Ol balalardy eptilikke, jyldamdyqqa, mergendikke úıretedi. Qazaqstanda 2 237 asyq oıyny úıirmesi bar. Onda 77 myńnan astam adam ulttyq sportpen shuǵyldanady.
5-oryn. Báıge
Báıge – halyq arasynda eń kóp taraǵan at sporty. Shabandozdardyń at jarysy qalyń kórermeni bar, esten ketpes erekshe áser syılaıtyn ulttyq sport túri. Búginde elimizde shabandozdardy daıyndaıtyn 753 úıirme jumys isteıdi. Onda 21 myńǵa jýyq bala ulttyq sporttyń qyr-syryn meńgeredi.
2022 jyly ulttyq sport túrlerimen júıeli túrde aınalysatyn qazaqstandyqtardyń sany 580 myńnan asqan. Al ulttyq sport túrleri boıynsha úıirmelerdiń sany 16 555-ke jetti.