Erteń Almatyda naızaǵaı jarqyldaıdy.
TJD Almaty turǵyndaryna naızaǵaı jarqyldaýy múmkin ekenin eskertti, dep habarlaıdy Almaty-akshamy.kz
Tótenshe jaǵdaılar departamenti Qazgıdromettiń daýyldy eskertýi negizinde Almatyda senbi, 13 mamyrda naızaǵaı boljanǵany týraly habarlady.
"Almatyda kóshpeli bult shyǵady. Kúndiz ótkinshi jańbyr jaýyp, naızaǵaı oınaıdy. Ońtústik-batystan ekpini sekýndyna 3-8 metr jel soǵady, naızaǵaı kezinde ekpini 13 m/s bolady. Aýa temperatýrasy túnde +15+17°S, kúndiz +24. + 26°S", - dep habarlaǵan edi sınoptıkter.
Departament almatylyqtarǵa naızaǵaı kezinde ne isteý kerek ekenin aıtty.
Páterde, úıde, ǵımaratta
"Eger naızaǵaı kezinde úıde bolsańyz, elektr symdarynan, antenalardan aýlaq bolyńyz. Terezelerdi jabyńyz, teledıdardy, radıony jáne basqa elektr quraldaryn óshirińiz, metal zattarǵa qol tıgizbeńiz", delingen Almaty Tótenshe jaǵdaılar departamentiniń baspasóz qyzmeti taratqan aqparatta.
Kólikte
Almaty turǵyndary naızaǵaı jarqyldaǵanda kólikte bolsa, ony tastamaı, terezelerdi jaýyp jáne radıo antenany túsirip, sonymen qatar kólik júrgizýdi toqtatýy kerek. Aýa raıynyń qolaısyzdyǵyn jol jıeginde nemese aǵash joq jerdegi turaqta kútýge keńes beriledi.
"Bıik jerde nemese ashyq jerde turmańyz, naızaǵaı qoıýıyn kólikte kútińiz. Qolaısyz aýa-raıynda kólikke janarmaı quıýǵa bolmaıdy. Kólik arasyna nemese kóliktiń artyna otyrmańyz, astyna tyǵylmańyz. Metal zattarǵa otyrmańyz jáne metal zattardy qolmen ustamańyz", dep eskertti Almaty Tótenshe jaǵdaılar departamentiniń baspasóz qyzmeti.
Sonymen qatar vedomstvo mundaıda velosıped pen motosıkldiń qaýipti bolýy múmkin ekenin atap ótti. Olardy jerge jatqyzyp, keminde 30 metr qashyqta qozǵalý kerek.
Dalada
"Eger syrtta bolsańyz, esińizde bolsyn: naızaǵaı kezinde júgirip, ábigerlenbeńiz, úreılenbeńiz. Barlyq metal áshekeılerińizdi (saqına, syrǵa, bilezik) sheshińiz", - dep keńes berdi Almaty qalasy Tótenshe jaǵdaılar departamentiniń baspasóz qyzmeti.
Bul rette almatylyqtarǵa elektr jelilerine nemese bıik aǵashtarǵa jaqyndamaýǵa, temir qorshaýǵa, bolat qubyrlarǵa, relsterge, basqa da elektr ótkizgishterge jaqyn turmaýǵa keńes berildi.
Buǵan deıin habarlaǵanymyzdaı, sınoptıkter Qazaqstanda 13 mamyr, senbi kúni aýa raıy turaqsyz bolatynyn aıtty.