«Pavlodar» áýejaıynda oqý-jattyǵýlar ótti, onyń maqsaty - áýe kemesiniń bortynda tótenshe jaǵdaılar kezinde túrli qyzmetterdiń is-qımyldaryna daıyndyqty arttyrý jáne úılestirý.
Pavlodar oblysy TJD bólimsheleri men áýejaı qyzmetkerleri adamdardy ushaqtan tez jáne qaýipsiz evakýasıalaý boıynsha jattyǵýlar ótkizdi, áýe kemesiniń bortynda órtti tıimdi sóndirý úshin ádister men jabdyqtar pysyqtaldy, dep habarlaıdy aqshamnews.kz Tótenshe jaǵdaılar mınıstrligine silteme jasap.
Oqý-jattyǵýdyń taktıkalyq oıyna sáıkes, Boeing 737-300 áýe kemesi qoný kezinde reaktıvti qozǵaltqyshtyń mehanıkasy zaqymdanyp 106 sharshy metr aýmaǵynda janý oryn aldy. Áýe kemesiniń komandıri áýe dıspecherine tótenshe jaǵdaıdyń týyndaýy, apattyq qoný jáne órt sóndirý ekıpajynyń qajettiligi týraly aqparat berdi. Apatqa ushyraǵan ushaqtan keıin shuǵyl qyzmet mamandary shartty zardap shekkenderdi evakýasıalaýǵa jáne órtti joıýǵa dereý kiristi.
Sondaı-aq, osyndaı oqý-jattyǵý «Áýlıe Ata» halyqaralyq áýejaıynda ótkizildi. Órt-taktıkalyq oqý-jattyǵýdyń senarıi boıynsha «Taldyqorǵan-SHymkent» áýe baǵyty boıynsha ushqan jolaýshylar ushaǵynyń qozǵaltqysh bólshegi aqaýǵa ushyrap, «Áýlı-Ata» halyqaralyq áýejaıyna apatty jaǵdaıda qonýǵa májbúr boldy. Ushaq apatty jaǵdaıda qoný barysynda janarmaı bagy zaqymdanýy saldarynan avıasıalyq otynnyń tógilý jaǵdaıy oryn alyp, órt shyqqan. Ushaqtaǵy órtti sóndirý úshin kómekke órt sóndirý qyzmetin shaqyrǵan áýejaıdaǵy jergilikti órt sóndirýshiler, olar kelip jetkenge deıin órt sóndirý jumystaryn júrgizdi. Al odan ári oqıǵa ornyna jedel jetken Jambyl oblysy TJD kúshteri men quraldary órtke oranǵan ushaqty sýmen, kóbikpen sóndirý jumystaryn atqaryp, sondaı-aq adamdardy qutqarý jáne qaýipsiz orynǵa kóshirý jumystarymen aınalysqan. Órt oqıǵasy ornynda 2 jaýyngerlik ýchastok qurylyp, 5 adam qutqarylyp, 85 adam qaýipsiz orynǵa kóshirildi. Zardap shekkenderge alǵashqy dárigerge deıingi kómek kórsetilip, jedel túrde aýrýhanaǵa jóneltildi.
Órt-taktıkalyq oqý-jattyǵýlar sońynda ushaqtaǵy órtti sóndirý boıynsha jan-jaqty túsindirý jumystary júrgizilip, oqý-jattyǵýlar qorytyndylandy.