Sybaılas jemqorlyq faktileri Almaty qalasynda, Shyǵys Qazaqstan, Qyzylorda jáne Soltústik Qazaqstan oblystarynda da tirkeldi.
TJ mınıstriniń aıtýynsha, qylmysqa barǵandar úzdik qyzmetkerler qatarynan bolǵan, dep habarlaıdy Almaty-akshamy.kz
Tótenshe jaǵdaılar mınıstrliginde sybaılas jemqorlyqtyń 70 prosentin bólimshe basshylary jasaǵan, dep málimdedi Antıkor.
TJM basshylyǵymen ótken keńeste Sybaılas jemqorlyqqa qarsy qyzmet tóraǵasy Asqat Jumaǵalı Tótenshe jaǵdaılar mınıstrligi bólimsheleriniń árbir ekinshi basshysy sybaılas jemqorlyqqa baratynyn málimdedi.
"Sońǵy 5 jylda azamattyq qorǵaý organdarynda 150-ge jýyq sybaılas jemqorlyq faktisi tirkelgen. Sybaılas jemqorlyq qylmystary elimizdiń barlyq óńirinde jasalǵan. Basym bóligi Almaty, Astana, Shymkent qalalarynda, sondaı-aq Qostanaı jáne Almaty oblystarynda", - delingen Antıkor málimdemesinde.
Vedomstvo áshkerelengen qylmystardyń ishinde paraqorlyq pen jymqyrý faktileri basym ekenin atap ótti. Zańsyz syıaqy órt qaýipsizdigin qamtamasyz etý boıynsha tekserý aktisine qol qoıý kezinde, oqýdan ótkizý, ruqsat berý jáne jumysqa ornalasý úshin berilip otyrǵan.
Antıkor tóraǵasynyń aıtýynsha, júrgizilip jatqan sybaılas jemqorlyqqa qarsy sharalarǵa qaramastan, TJM qyzmetkerleri para alýdan tyıylar emes.
"Kúni keshe Jetisý oblysynda jergilikti TJ bólim basshysy jumysqa alǵan adamnan aqsha alǵany anyqtaldy. Búgingi is-sharanyń ótetinin bile tura, sonda da qylmysqa baryp otyr. Bul oraıda profılaktıkalyq turǵyda naqty áreket etý qajet. Qyzmetkerlerdiń minez-qulqyn túzetip, psıhologıalyq kózqarasyn ózgertý mańyzdy", - dep málimdedi Jumaǵalı otyrysta.
Buǵan deıin Antıkor TJM Órtke qarsy qyzmet komıtetiniń tóraǵasy, Shymkent qalasy jáne Jetisý oblysy departamentteri basshylaryn ustaǵan edi. Olar órtke qarsy qaýipsizdik salasyndaǵy qamqorlyǵy úshin kásipkerlerden júıeli túrde para aldy, tekseriletin uıymdardy kelisimshart jasasý jolymen qyzmetterdi satyp alýǵa májbúrlep, olar boıynsha ýaqtyly aqy tóleýin qamtamasyz etti degen kúdikke ilindi.
TJ mınıstri vedomstvo sybaılas jemqorlyqqa qarsy kúresti kúsheıtý úshin túbegeıli qadamdar jasaıtynyn málimdedi.
"Bul bizdiń qyzmetkerler úshin jaǵa ustatarlyq jaǵdaı. Atalǵan adamdar belgili bir jetistikterge qol jetkizgen úzdik qyzmetkerlerdiń qatarynan bolatyn. Degenmen osy jaǵdaıda olardyń biz bilmegen teris qasıeti – ekijúzdiligi áshkerelendi. Aıtylyp ótken derekterge qatań synmen qaraımyz. Budan biz tıisti sabaq alamyz, qarapaıym órt sóndirýshiler bizge senimmen qaraýy kerek" - dedi Syrym Sháriphanov.
Antıkor TJ mınıstrligine jeke quram arasynda júrgiziletin aldyn alý jumystaryn kúsheıtýdi usyndy.
"Sybaılas jemqorlyq táýekelderine ishki taldaý júrgizip, problemalyq ýchaskelerdi zerdeleý, sondaı-aq vedomstvonyń barlyq qyzmetkerin adaldyq turǵysynda tekserýdi aprobasıalaý qajet" - dedi Asqat Jumaǵalı.