Qazaqstan TJM aýyldyq eldi mekenderdegi qaýipsizdikti nyǵaıtý boıynsha júıeli jumysty jalǵastyrýda. Osynyń sheńberinde jergilikti atqarýshy organdardy órtke qarsy qorǵaýdy nyǵaıtýǵa qoldaý kórsetý boıynsha «Aýyl qutqarýshylary» baǵdarlamasy iske asyrylýda. Aýyl-bizdiń qoǵamymyzdyń negizi, aýyl turǵyndarynyń qaýipsizdigin qamtamasyz etý mınıstrliktiń turaqty nazarynda, dep habarlaıdy aqshamnews.kz
Joba tótenshe jaǵdaılar mınıstri general-maıor Shyńǵys Árinovtiń basym bastamalarynyń birine aınaldy. Osylaısha memlekettik órtke qarsy qyzmet pen eriktiler kezeń kezeńimen óńirlerge biryńǵaı qoldaýdy belsendi damytýda.
Baǵdarlamanyń maqsaty memlekettik órtke qarsy qyzmet joq shalǵaı eldi mekenderde jedel jáne tıimdi kómek júıesin qurý. Tabıǵı jaǵdaılar men qashyqtyqty eskere otyryp, bul jerde ýaqtyly den qoıý óte mańyzdy.
«Aýyl halqy da qalalardyń turǵyndary sıaqty qorǵalýy kerek. Erikti qurylymdar den qoıý júıesiniń tolyqqandy bóligine aınalady. Qaýipsizdik deńgeıin jáne turaqty ınfraqurylymdy arttyrý úshin naqty jaǵdaılar jasalýda, onda turǵyndardyń ózderi mańyzdy ról atqarady», - dep mınıstr atap ótti.
Baǵdarlama sheńberinde TJM aýyl ákimdikterine órt sóndirý tehnıkasy men jabdyqtaryn beredi, erikti órtke qarsy quralymdar men beketter jelisi damýda, eriktilerdiń kezekshiligi men jumysy úshin jaǵdaı jasalýda, barlyq jergilikti bólimsheler úshin biryńǵaı vızýaldy sáıkestendirý engizilýde.
Jyl basynan beri Abaı, Almaty, Qaraǵandy, Soltústik Qazaqstan jáne Shyǵys Qazaqstan oblystarynyń memlekettik órtke qarsy qyzmet joq aýyldyq eldi mekenderinde vedomstvo basshysynyń qatysýymen 5 erikti beket ashyldy. Osy bólimshelerge qyzmet atqarý úshin zamanaýı tehnıka, jabdyqtar men kıim-keshekter berildi.
Bıylǵy jyldyń sońyna deıin elde 40 erikti órtke qarsy quralym men jergilikti atqarýshy organdardyń beketin qurý josparlanýda. Olardy qamtamasyz etý úshin mınıstrlik 150 birlik órt tehnıkasyn berýdi kózdedi. Sondaı-aq jumys istep turǵan 34 erikti órt sóndirý beketin kezeń-kezeńimen jańartýǵa erekshe nazar aýdaryldy. Bul tótenshe jaǵdaılarǵa den qoıýdyń jedeldigi men tıimdiligin edáýir arttyrýǵa múmkindik beredi.
Qazaqstan TJM aýyl qaýipsizdigine, órtke qarsy qaýipsizdikti, azamattardyń senimin nyǵaıtýǵa jáne eriktilik mádenıetin damytýǵa júıeli kózqarasqa strategıalyq úles qosady.