TJM áýe parki Qazaqstanda qurastyrylǵan MI-8AMT eki jańa tikushaǵymen tolyqty
24 maýsymda Almaty qalasynda «№405 avıajóndeý zaýyty» AQ aýmaǵynda Qazaqstan Respýblıkasynyń Tótenshe jaǵdaılar mınıstrligine Qazaqstanda qurastyrylǵan Mı-8AMT eki tikushaǵyn berý rásimi ótti, dep habarlady Almaaty-akshamy.kz QR TJM tarathan habaryna silteme jasap. İs-sharaǵa Tótenshe jaǵdaılar birinshi vıse-mınıstri Ibragım Kúlshimbaev qatysty.
Ol 2020 jylǵy jeltoqsanda Qazaqstanda qurastyrylǵan Mı-8AMT alǵashqy 2 tikushaǵy da Qazaqstan TJM-niń paıdalanýyna berilgenin atap ótti. Áýe kemeleri Nur-Sultan, Almaty qalalarynda ázirlikte tur. Olar Túrkistan oblysynyń taýlaryndaǵy izdestirý-qutqarý operasıalaryna, shuǵyl medısınalyq evakýasıalaýǵa, orman avıasıalyq jumystaryna jáne elimizdiń aýmaǵyndaǵy sý tasqyny qaýpi bar kezeńde aerovızýaldy barlaý jumystaryna jumyldyryldy.
TJM tikushaqtar parkin tolyqtyrý «Qazaqstan ınjınırıń» UK» AQ, «№ 405 avıajóndeý zaýyty» AQ jáne «Reseı tikushaqtary» AQ arasyndaǵy úshjaqty kelisim aıasynda iske asyrylady.
Tikushaqtar TJM oryndaıtyn mindetterdi eskere otyryp qalyptastyrylǵan. Olar jolaýshylar men júkterdi tasymaldaýǵa, zilzalalar men tabıǵı apattar aımaqtaryndaǵy avarıalyq-qutqarý jumystaryna, ormandardy kúzetýge, órt sóndirýge, sondaı-aq halyqqa sanıtarıalyq avıasıa qyzmetterin kórsetýge beıimdelgen.
Tehnıka avıasıalyq qyzmetter men jumystardyń keń spektrin oryndaýǵa arnalǵan. Ol zamanaýı jabdyqtarmen, ushýdyń praktıkalyq aýqymyn 2 esege arttyratyn qosymsha otyn baktarymen jabdyqtalǵan.
Mı-8AMT modıfıkasıalanǵan áýe kemesinde ushýlardy oryndaý úshin TJM ushý jáne ınjenerlik-tehnıkalyq quramynan 18 adam (12 ushqysh jáne 6 bort-mehanık) Ulan-Ýde qalasyndaǵy «Bargýzın AK» avıasıalyq oqý ortalyǵynda ushý daıarlyǵynan ótti.
İs-shara sońynda birinshi vıse-mınıstr aldaǵy ýaqytta TJ mınıstrliginiń materıaldyq-tehnıkalyq bazasyn nyǵaıtý boıynsha jumys jalǵasatynyn atap ótti. Ol tabıǵı jáne tehnogendik sıpattaǵy tótenshe jaǵdaılar kezinde qutqarý operasıalaryn júrgizýdiń tıimdiligin arttyrýǵa múmkindik beredi.
