Kýrsanttardy oqytý respýblıkalyq búdjet esebinen júzege asyrylady.
SHQO Tótenshe jaǵdaılar departamenti men Órt sóndirý jáne avarıalyq-qutqarý jumystary qyzmetinde QR TJM M.Ǵabdýllın atyndaǵy azamattyq qorǵaý akademıasyna oqýǵa túsýge qabyldaý bastaldy, dep habarlaıdy Almaty-akshamy.kz.
«Akademıaǵa kúndizgi oqýǵa orta bilimi bar, on alty jasqa tolǵan, densaýlyq jaǵdaıy boıynsha áskerı qyzmetke jáne oqýǵa jaramdy Qazaqstan Respýblıkasynyń azamattary qabyldanady. Jańa ózgeris boıynsha onda qyzdarǵa da túsýge múmkindik bar. Akademıaǵa qabyldaý medısınalyq, fızıkalyq jáne psıhofızıologıalyq kórsetkishterge sáıkes irikteý nátıjelerin eskere otyryp, UBT sertıfıkatynyń baldaryna sáıkes konkýrs boıynsha júrgiziledi», - dep málimdedi departamenttiń baspasóz qyzmeti.
Kýrsanttardy oqytý respýblıkalyq búdjet esebinen júzege asyrylady. Kýrsanttar barlyq oqý kezeńine tegin kıim-keshekpen, tamaqpen jáne memlekettik stıpendıamen qamtamasyz etiledi.
Sondaı-aq kýrsanttarǵa demalys kezinde jol júrý aqysy tólenedi. Oqý merzimi - 4 jyl. Oqý ýaqyty men merzimi áskerı qyzmet ótkerýmen teńestiriledi, - delingen aqparatta.