Jigitter naǵyz batyldyq tanytyp, qaıǵyly jaǵdaıdyń aldyn aldy.
Tótenshe jaǵdaılar mınıstri órtten eki adamdy qutqarǵan qaraǵandylyq oqýshylar – Erasyl jáne Qanat Smaǵulovtardy jáne olardyń kórshisi Rýslan Túsipovti «Órtte kórsetken qaısarlyǵy úshin» medalimen marapattady, dep habarlaıdy Almaty-akshamy.kz QazAqparatqa silteme jasap.
Saltanatty marapattaý sharasy aǵaıyndy Smaǵulovtar oqıtyn №12 mektepte ótti. Qaraǵandy oblystyq Tótenshe jaǵdaılar departamenti bastyǵynyń orynbasary Nurlan Bekbosynov batyrlarǵa vedimistik medaldar men estelik syılyqtardy oqýshylar men pedagogtardyń qatysýymen ótken jıynda tabys etti.
Óz kezeginde oblystyq bilim basqarmasynyń basshysy Gúlsim Qojahmetova oqýshylarǵa Bilim mınıstriniń alǵys hattary men estelik syılyqtaryn tartý etti.
«Jigitter naǵyz batyldyq tanytyp, qaıǵyly jaǵdaıdyń aldyn aldy. Buǵan bári birdeı batyldyq tanyta almaıdy, bul erlik pen sheshimdilikti qajet etedi. Balalaryn durys tárbıelegen batyrlardyń ata-analaryna alǵys aıtamyz», – dedi Nurlan Bekbosynov.
Eske salaıyq, 23 qańtarda Jeńis kóshesinde turǵyn úıge bekitilgen qazandyqta órt shyqty. Kórshi úıde turatyn Erasyl men Qanat Smaǵulovtar qart kórshilerge aýlalaryn qardan tazartýǵa kómek kórsetip jatqan bolatyn. Olar qazandyqtan shyqqan tútindi kórip, kómekke umtylǵan. Aǵaıyndylar eki zeınetkerge úıden shyǵýǵa kómektesti, olardyń biri – baldaqqa súıengen qart. Balalar kıim-keshek pen qujattardy da shyǵaryp úlgerdi. Kómekke kórshileri Rýslan Túsipovti shaqyrǵan. Órt sóndirýshilerge de habar bergen. Qutqarýshylar jetkenshe jalyndy qolǵa túsken zattarmen sóndirýge kirisken.
Keıin eki oqýshyǵa Oqý-aǵartý mınıstri Ǵanı Beısembaev alǵys aıtqan bolatyn.