Almatylyq er adam osydan eki jyl buryn stamotologıalyq kresloda kóz jumǵan qyzynyń qazasyna baılanysty áli ádildik izdep júr, dep habarlaıdy Almaty-akshamy.kz.
Bul ólimniń oryn alýyna ol dárigerdiń saýatsyzdyǵy sebep bolǵan deıdi. Aıtýynsha, narkozda jatqan naýqasqa preparatty teksermeı salyp jibergen.
Almaty.tv arnasynyń aqparatyna júginsek, qyzynyń qazasynan qabyrǵasy qaıysqan azamat eki jyldan beri ádildikke qol jetkize almaı keledi. Sózine qaraǵanda, qyzy óziniń úılený toıynyń aldynda tisin juldyrý úshin barǵan. Alaıda tis emhanasynan ákesi óz aıaǵymen barǵan qyzynyń tabytyn alyp qaıtqan.
«Kim kináli deısiz be? Olar bárin aldyn ala eskerýi tıis edi. Olar dárigerler emes pe? Klınıka jumysyn áli de jalǵastyryp jatyr. Qyzmet kórsetý tizimi kóbeımese, azaıǵan joq. Al marqum qyzym onda tisin juldyrýǵa barǵan edi... Biraq tergeý tym sozylyp ketti», - dedi marqumnyń ákesi Aleksandr Sergeev.
Oıy san-saqqa bólingen áke «aq halattylar qyzymnyń esin jıǵyzbaq bolyp, keýde tusyna qatty qysym jasaǵan»deıdi. Óıtkeni tós súıegi men birneshe qabyrǵasynyń synǵany anyqtalǵanyn aıtyp otyr. Tipti, qyzynyń túbine jetken ekpeni de biledi eken. Biraq klınıkadaǵy mamandar muny teriske shyǵarsa kerek. Medısınalyq mekemeniń mańaıyna da jýytpaı, azamatqa jaýap qatpaǵan.
«Dárigerdiń aıtýynsha, jalpy narkoz salyp uıyqtatqan. Sodan soń aýyz qýysyn jansyzdandyrý úshin "ýbestezın" degen dárini salǵan. Medısınalyq saraptama kezinde osy preparat bolǵan. Sol dári ólimge alyp kelýi múmkin. Olar qazir ózderin múlde kinálimiz dep sanamaıdy. Bári hattama boıynsha aqtalyp otyr. Qaıdaǵy hattama? Meniń hattamam tabytta jatyr», - dep kúıinedi marqumnyń ákesi Aleksandr Sergeev.
Eki jyl buryn bastalǵan daýly máselege qatysy bar degen klınıkaǵa arnadaǵy áriptesterimiz de baryp kórgen. Jekeniń menshigindegi medısına ortalyǵy jýrnalıserdi "bilmeımiz", "kórmedik" dep qana shyǵaryp salǵan. Al keıipker kiná taǵyp otyrǵan tis dárigeri qyzmette ósip, klınıkanyń bas keńsesinde jumysyn jalǵastyryp jatqan kórinedi. Munda da bas dáriger suhbat berýden bas tartqan.
«Ázirshe kim kináli ekeni belgisiz. Bizdiń maqsatymyz - tolyq zerdelep, tekserý. Medısınalyq qylmys uzaq tergeledi, óıtkeni bir emes, birneshe maman jumyldyrylady. Olar da jan-jaqty zertteý júrgizedi. Qylmystyq kodekstiń 317-babynyń 3-tarmaqtary tirkelip, qazirgi tańda qosymsha keshendi sot medısınalyq saraptama taǵaıyndaldy», – dedi PD resmı ókili Saltanat Ázirbek.
Farm-baqylaý komıtetiniń málimetinshe, byltyrdyń ózinde 7 myńǵa jýyq shaǵym kelip túsken. Onyń ishinde 350 is tis dárigeriniń jumysyna qatysty. Al kezekten tys tekseriske túsken 43 tis emdeý klınıkasynda qyzmet kórsetý standarty buzylǵany anyqtalǵan. Densaýlyq saqtaý mınıstrliginiń málimetinshe, kelgen naýqastardyń densaýlyǵyna qatysty anyqtama qaǵazy toltyrylmaǵan.