Morenalyq-muzdyq keshenderdiń, morenalyq kólderdiń, qar kóshkini jáne kóshkin qaýpi bar aımaqtardyń jaǵdaıyn baqylaý maqsatynda, Jetisý oblysy TJD qyzmetkerleri «Qazseldenqorǵaý» MM mamandarymen birlese otyryp, Qora, Shaja, Kóktal, Kóksý, Ósek, Tyshqan, Qorǵas, Aqsý, Búıen, Basqan, Sarqan jáne Lepsi ózenderi baseınderinde aerovızýaldy tekserý jumystaryn júrgizdi.
Tekseris barysynda, bıik taýly aımaqtarda ózen arnalarynyń jaǵalaryna ózdiginen qar kóshkininiń túskeni anyqtaldy, biraq ózen arnalarynyń bitelýi baıqalmady. Ózen sýlary erkin, keptelissiz aǵýda.
Ózen arnalarynyń boıyndaǵy betkeılerde kóshkin qubylystary anyqtalmady. Morenalyq kólder qysqy rejımde. Qar jamylǵysy teńiz deńgeıinen 2000 metr bıiktikte 50 sm-ge deıin, 3000 metr jáne odan da kóp bıiktikte 100-den 150 sm-ge deıin jetedi.
Jalpy, Jetisý oblysynyń taýly aımaqtarynda jaǵdaı turaqty, alaıda aýa temperatýrasynyń kóterilýine baılanysty qar kóshkini qaýpi saqtalýda.