Qazaqstannyń alty qalasynda qoǵamdyq kólikte jynystyq azǵyndyqqa qarsy is-qımyl boıynsha aksıa bastaldy.
Avtobýs salondarynda qoǵamdyq kólikte jynystyq azǵyndyqqa tap bolǵandar úshin is-qımyl algorıtmi bar plakattar ornalastyryldy, dep habarlaıdy Almaty-akshamy.kz.
«Tıispe» aksıasynyń maqsaty – bul qoǵamdyq kóliktegi harassmentke qarsy turý jáne qoǵamda bul qubylysqa jekkórinýshilikti qalyptastyrý. Plakattar Almaty, Shymkent, Atyraý, Pavlodar, Óskemen jáne Semeı qalalarynda 300-den astam avtobýsqa jabystyrylǵan.
Qazaq jáne orys tilderindegi plakattarda qoǵamdyq kólikte harassmentpen betpe-bet kelgenderge arnalǵan nusqaýlyq berilgen. Jynystyq harassment qurbandary posterdegi QR arqyly óz oqıǵasymen anonımdi túrde bólise alady.
«Bul aksıa – májbúrli shara. Shymkentte № 52 marshrýtta jolaýshylardyń biri qyzdarǵa qarap, ózin-ózi qanaǵattandyrǵan jaǵdaılar boldy. Mundaı jaǵdaıda qyzdar ne isterin bilmeı qalady. Sondyqtan qoǵamdyq kólikte harrasment kezinde qalaı áreket etý keregin túsindiretin plakattardyń bolǵanyn qalaımyz», – dedi «Shymkent bus»JSHS avtopark dırektorynyń orynbasary Álfarabı Ábdirash.
Aksıany Astanadaǵy EQYU baǵdarlamalar keńsesi men kanadalyq jergilikti bastamalar qorynyń (Cfli) qoldaýymen MediaNet Halyqaralyq jýrnalısıka ortalyǵy uıymdastyrdy.
Ortalyq júrgizgen zertteý qorytyndysy boıynsha Qazaqstandaǵy áıelderdiń 21%-y qoǵamdyq oryndarda harassmentke tap bolǵan. Alaıda, sarapshylardyń aıtýynsha, shyn máninde statısıka budan da joǵary. Ártúrli sebeptermen jynystyq harassment qurbandary bul týraly aıtpaı, jasyryp qalady.
Uıymnyń negizin qalaýshy Igor Bratsev barlyq oblys ortalyqtary men respýblıkalyq mańyzy bar qalalardy aksıamen qamtýdy josparlap otyr.
«Alǵashqy baǵyt – Astana men Almaty. Biraq Astana bas tartty. Bul birtúrli kórindi, óıtkeni munymen kúresý ákimdikke de tıimdi. Avtobýstar men aıaldamalarǵa plakattardy ózimiz basyp shyǵaramyz», – dedi Bratsev.
City Transportation Systems harassment máselesiniń ózektiligin aıtty. Eger uıymdastyrýshylar posterlerdi ornalastyrý týraly usynyspen júginse, aksıa elordalyq avtobýstarda da iske qosylady.
«Aldymen aksıa onlaın rejıminde bastaldy, sodan keıin oflaın rejımge kóshti. Qoǵamdyq kólikter men aıaldamalarda plakattar ornalastyryldy. Bul ıdeıa qurbandarǵa ǵana emes, eń aldymen qaskóılerge baǵyttalǵan. Olar bul áreketi úshin jazasyz qalmaıtynyn túsiný kerek», – dep túıindedi Igor Bratsev.