«Astana – mádenıet kerýeni» áskerı orkestrlerdiń I halyqaralyq áskerı-mýzykalyq festıvali ótedi.
Elordanyń 25 jyldyǵyna oraı Qorǵanys mınıstrligi qalalyq ákimdikpen birlesip, osy sharany qolǵa alǵan, dep habarlaıdy Almaty-akshamy.kz.
QR Qorǵanys mınıstrliginiń málimetinshe, 6 shildeden bastap, úsh kún qatarynan, qalanyń ártúrli alańdarynda Ázerbaıjan, Úndistan, Qytaı, Reseı, Túrkıa, Ózbekstan jáne Japonıa Qarýly kúshteriniń mýzykalyq ujymdary óner kórsetetin bolady. Pákistan delegasıasy baıqaýshy retinde kelmek.
Qazaqstan atynan Memlekettik kúzet qyzmetiniń Prezıdenttik orkestri, Qarýly kúshter Ulttyq áskerı-patrıottyq ortalyǵynyń Ortalyq áskerı orkestri jáne Ulttyq ulannyń úlgili-kórsetilimdi orkestri qatysady.
5 shilde kúni saǵat 12.00-de Ortalyq komýnıkasıalar qyzmetinde Qorǵanys mınıstrliginiń ókilderi ótkiziletin is-sharanyń erekshelikteri men maqsattary týraly egjeı-tegjeıli aıtyp beredi.
Kórsetilimderdi Band Marathon bastaıdy. Ol 6 shildede saǵat 19.30-da Esil ózeniniń jaǵasyndaǵy jazǵy amfıteatrda ótedi.
7 shilde saǵat 20.00-de elordanyń túrli alańdarynda ótetin shoýdyń qoıylymy qala turǵyndary úshin erekshe syılyq bolmaq. Ortalyq saıabaqta Qazaqstan Prezıdenttik orkestri men Úndistan, Ózbekstan jáne Japonıanyń áskerı ujymdary óner kórsetedi. «Báıterek» monýmentinde Qazaqstan, Reseı jáne Túrkıa qorǵanys mınıstrlikteriniń orkestrleri óz baǵdarlamalaryn usynady. Al «Han Shatyr» saýda-oıyn-saýyq ortalyǵynda Ázerbaıjan, Qytaı jáne Qazaqstan Ulttyq ulanynyń okestrleri óner kórsetpek.
İs-sharalar 8 shildede «Barys Arena» muz saraıynda ótetin gala-konsertpen aıaqtalady. Bastalýy saǵat 12.00-de. Onda kórermender orkestrler defılesi, olardyń birlesken qoıylymdary jáne mýzykalyq tosynsyılary bar qyzyqty mýzykalyq-teatrlandyrylǵan qoıylymnyń kýási bolady.
Ázerbaıjan Respýblıkasy Geıdar Alıev atyndaǵy áskerı ınstıtýty orkestriniń repertýarynda zýrna men balabannyń sıqyrly dybystary bar armıa sherýleri men ulttyq áýender bar. XIV ǵasyrǵa deıin Ázerbaıjan óneri Taıaý Shyǵys halyqtarynyń mýzykalyq dástúrlerimen tyǵyz baılanysty boldy. Muny Shyǵys mýzykasynan habary bar sezimtal kóremen birden ańǵarmaq.
Úndistan Áskerı-áýe kúshteri orkestriniń mýzykanttary kórermendi túrli-tústi, erekshe formasymen jáne kompozısıalarynyń ereksheligimen tań qaldyratyn bolady. Onda dástúrli eýropalyq aspaptardyń dybysy úndi sıtary men sarodyna basa nazar aýdarylady.
Halyqtyń baı mádenı tájirıbesin mura etken Qytaı Halyq-azattyq armıasy áskerı orkestriniń qoıylymynda tyńdaýshylar ejelgi mýzykalyq dástúrlerdi de, orkestr óneriniń qazirgi tendensıalaryn da túsine alady.
Saptyq, klasıkalyq jáne jaz áýenderimen Reseı Qorǵanys mınıstrligi Batys áskerı okrýginiń 23-shi áskerı orkestri óner kórsetedi. Orys mýzykanttarynyń oryndaý tásili sheberlikpen, ıntonasıanyń tazalyǵymen jáne názik núanstarymen erekshelenedi.
Túrkıanyń san ǵasyrlyq mýzykalyq dástúrleri «Mehteran» áskerı orkestriniń oryndaýshylyq mádenıetinen baıqaldy. Túrik áskerı mýzykasy eýropalyq áskerlerdiń bravýr marshyna áste uqsamaıdy. Ataqty Mosarttyń «Túrik marshy» da halyqaralyq festıvál baǵdarlamasynda mindetti túrde oryndalatyny kóńil qýantady.
Ózbek kerneıiniń dybysy da qazaqqa jaqyn. Bul baýyrlas halyqtardyń mýzykalyq dástúrleriniń jaqyndyǵyn kórsetedi.
Taıko barabandary – japon áskerı orkestrin tanymal etip kele jatqan dástúrli aspap. Ejelgi nanym boıynsha, olar shaıqasta jaýdyń úreıin ushyryp, komandalardy jetkizip, jaýyngerlik manevrlerdi úılestirgen. Festıválde Japonıanyń Ózin-ózi qorǵaý teńiz kúshteriniń «Tokıo bend» orkestri astanalyqtarǵa ejelgi áskerı mýzyka men zamanaýı marshtardyń úlgilerin usynbaq.
Astana kúnine oraı uıymdastyrylǵan halyqaralyq áskerı orkestrler festıvali Qazaqstannyń yntymaqtastyq pen tatý kórshilikke degen umtylysyn kórsetedi. Mýzyka men óner tili qýatty biriktirýshi kúsh retinde qyzmet etedi. Búginde ol beıbitshilik pen jasampazdyq jarshysy bola bersin.