Ticketon Awards 2024 júldesine arnalǵan bul shara elimizdiń mádenıet, óner jáne sport salasyndaǵy úzdik jetistikterdi qurmetteýdi maqsat etti.
Almaty teatrynda jetinshi ret uıymdastyrylǵan Ticketon Awards 2024 syılyǵynyń qorytyndy saltanaty ótti. Bıylǵy is-sharada 300-den astam úmitker arasynan 34 atalym boıynsha úzdikter anyqtaldy.
"Shámshi Qaldaıaqovtyń án keshi" jyldyń eń úzdik konserti atanyp, júldege ıe boldy
Qazaq halqynyń súıikti kompozıtory Shámshi Qaldaıaqovqa arnalǵan án keshi 2023 jyldyń eń úzdik konserti bolyp tanyldy. Marapatty Qazaqstannyń eńbek sińirgen qaıratkeri, "Qurmet" ordeniniń ıegeri Qaldybek Qurmanáli jáne Shámshiniń nemeresi, Qazaqstan Respýblıkasy Mádenıet salasynyń úzdigi Aısulý Qaldaıaqova aldy.
Qaldybek Qurmanáli saltanatty shara barysynda:
- "Qazaq válsiniń koroli, kompozıtor - Shámshi Qaldaıaqov qazaq halqyna bir-aq ret berilgen Alla Taǵalanyń erekshe syıy. Jabyqqanda, jalǵyzsyraǵanda, áldebireýden jábir kórgende, “osylar muńaımasynshy” dep Jaratýshy ıemiz bizge Shámshini bergen. Sonyń ánimen jubansyn, sonyń ánimen rýhtansyn dep Shámshini syılaǵan," - dep atap ótti.
Mádenı sharalardyń úzdikteri
Ótken jyly halyqtyń yqylasyna ıe bolǵan mádenı sharalar qatarynda «Oıan, qazaq!» fılmi men «Gaýhartas» qoıylymy erekshe atalyp ótti. «Úzdik sheteldik fılm» atalymy boıynsha kórermenniń basym daýysymen «Oppengeımer» kartınasy jeńimpaz atandy. Sondaı-aq, Bolat Ábdilmanov, Darıǵa Badyqova, Baqyt Qajybaev úzdik akterler retinde tanyldy.
Bolat Ábdilmanov, Qazaqstannyń eńbek sińirgen qaıratkeri:
- "Mundaı marapattar alǵan kezde biz bir jaǵynan, árıne, sen áli de attyń ústinde ekenińdi, pensıaǵa shyqsaq ta, áli qatardan qala qoımaǵanymyzdy dáleldeıdi. Bolashaqtaǵy jumystarǵa úlken bir qoshtaý bolady dep oılaımyn," - dedi.
Áleýmettik jelidegi juldyzdar
Áleýmettik jelide hımıa elementterin ánge qosqan Ulan Úsenov te úzdikter qatarynda boldy. Saltanatty sharada «Áleýmettik bastama» jáne «Mádenı-aǵartýshylyq joba» atalymdary da óz ıelerin tapty.
Daýys berý qorytyndylary
Ticketon syılyǵyna úmitkerlerge daýys berý 8 aqpan men 10 naýryz aralyǵynda ótti. Jalpy 154 620 daýys tirkelgen.
Vıktorıa Torgýnakova, Freedom Ticketon kompanıasynyń bas dırektory:
- "Bizdiń maqsatymyz – mádenı ortanyń tynys-tirshiligin kórsetý, jyl saıyn jarq etken jańa juldyzdardy ereksheleý, sonymen qatar laıyqty baǵasyn berý. Bul – ulttyń rýhanı ósýine eńbek etip júrgen sahna ókilderine, qoǵam qaıratkerlerine, sportshylarǵa qurmet," - dedi.
Sporttyq jetistikter
Ótken jyldyń eń jarqyn sporttyq oqıǵasy retinde «Qazaqstan-Danıa» fýtbol machy tanyldy. Ulttyq quramanyń jeńisimen aıaqtalǵan sporttyq shara 1513 daýys jınaǵan.
Ticketon Awards 2023 júldesine arnalǵan bul shara elimizdiń mádenıet, óner jáne sport salasyndaǵy úzdik jetistikterdi qurmetteýdi maqsat etti.