Almaty ákimi Erbolat Dosaev Bostandyq jáne Almaly aýdandary turǵyndarynyń ınfraqurylymdyq jáne áleýmettik máselesin sheshý barysymen tanysty, dep habarlaıdy almaty-akshamy.kz
Almaty ákimi Erbolat Dosaev Bostandyq jáne Almaly aýdandaryn josparly aralaý barysynda áleýmettik jáne ınfraqurylymdyq jobalardy, onyń ishinde sýmen jabdyqtaý jelilerin salý, mektepterdi jóndeý, qoǵamdyq keńistikterdi kórkeıtý jobalaryn iske asyrý barysymen tanysty.
Bostandyq aýdany Markov kóshesindegi jańartylyp jatqan uzyndyǵy 1,2 km qubyr qala ákiminiń nazaryna ilikken ózekti máseleniń biri. Bul jeli 50-shi jyldardyń sońynda paıdalanýǵa berilgen, qazir ábden tozyp, isten shyǵyp, sýmen qamtýda syr berip otyr. Byltyr bastalǵan jumys merdigerdiń kesirinen keshiktirildi, sonyń saldarynan ony jaýapsyz jetkizýshi dep taný týraly talap qoıyldy. Budan basqa, qala qurylysyn baqylaý basqarmasy megapolıs basshysynyń tapsyrmasymen kompanıa aldyndaǵy mindetteniń oryndalýyn tekseredi.
Erbolat Dosaev nysandy tezirek paıdalanýǵa berýdi jáne qazý ornynda asfált tósemdi qalpyna keltirýdi tapsyrdy. Jańartylǵan qubyr 43 kóppáterli turǵyn úıdi jáne aýdannyń 6 ákimshilik ǵımaratyn sapaly sýmen qamtamasyz etýge múmkindik beredi.
Almaly aýdanyndaǵy Volhovskaıa kóshesinde ornalasqan sýmen qamtý stansıasynyń da jaǵdaı máz emes. 32 jyldan astam ýaqyt boıy jóndelmegen nysan apat men sýmen qamtýdaǵy úziliske sebep. Máseleni túbegeıli sheshý úshin qala basshysy stansıany jabdyqty aýystyrýmen jáne ǵımaratty jóndeýmen qaıta qurýdy tapsyrdy. Apattyq-qalpyna keltirý jumystaryn osy jyldyń maýsym aıynda bastaý josparlanǵan. Qaıta qurý 4 kópqabatty úıdiń 500-den astam turǵynyn turaqty ári sapaly sýmen qamtamasyz etedi. Aıta keteıik, aýdanda Áıtıev pen Tóle bı kóshesiniń boıyndaǵy apatty jaǵdaıdaǵy eki sorǵy stansıasy qalpyna keltirildi.
Qalada bilim berý nysandaryna kúrdeli jóndeý jáne seısmıkalyq kúsheıtý jumystary júrgizilýde, onyń ishinde 30 jyl buryn salynǵan №70 mektep bar. 2022 jyly jóndeý jumystary bastaldy, biraq merdiger merzimdi buzdy. Sol úshin oǵan aıyppul salyndy. Erbolat Dosaev ishki árleýdiń kemshilikterine zer salyp, mektepti jabdyqtaýǵa erekshe nazar aýdarýdy, kireberistegi nóser sýyn burýdy, sondaı-aq jańa oqý jyly bastalǵanǵa deıin barlyq jumysty aıaqtaýdy tapsyrdy.
Buǵan deıin habarlanǵandaı, Saıran sý qoımasynyń aýmaǵyn aýqymdy abattandyrý jalǵasýda. Qala ákimine eskirgen konstrýksıalar men sáýlet nysandaryn súrý jumystary aıaqtalǵany týraly baıandaldy. Joba aıasynda demalys aımaqtaryn qurýdy kózdelgen, munda alǵash ret eki jaǵalaýdy baılanystyratyn pontondy ótkelder ornatylyp, lotos otyrǵyzylady. Kógaldandyrýǵa jáne qaýipsizdikti qamtamasyz etýge erekshe nazar aýdarylady. Jańartylǵan jaǵalaý qala turǵyndary men qonaqtary úshin demalys ortalyǵyna aınalady.
Sondaı-aq, Almaly aýdanynda turǵyndardyń ótinishimen tozyǵy jetken nysandardyń ornyna Seıfýllın dańǵyly men Mámetova kóshesiniń qıylysynda aýdany 0,3 ga jańa skver salynady. Megapolıs basshysy áleýmettik jaýapkershilik aıasynda ınvestor esebinen júzege asyrylatyn jobany qarap shyqty. Jumys bıyl qazan aıynda bastalmaq.
Uzaq ýaqyt qaraýsyz qalǵan qalalyq keńistikterdiń de ekinshi tynysy ashylady. Mysaly, Abaı dańǵylynyń boıyndaǵy Turǵyt Ózal kóshesinen Muqanov kóshesine deıingi bólý jolaǵynda jóndeý jumystary 15 jyl buryn júrgizilgen. «Halyq qatysatyn búdjet» jobasy boıynsha munda jaryqtandyrý júıesi, jaıaý júrginshiler aımaǵy jańartylyp, sýarý júıesi ornatylady. Joba osy jyldyń kúzinde júzege aspaq. Erbolat Dosaev qala turǵyndary úshin qolaıly jaǵdaı jasaý úshin sapaly materıaldar men kóshe jıhazdaryn paıdalaný qajettigin atap ótti.
Sonymen qatar, «Halyq qatysatyn búdjet» boıynsha Mámetova kóshesi, 29/41 mekenjaıy boıynsha aýla jóndeldi. Qala basshysy aýmaqty aralap, qala turǵyndarynyń kórkeıtý jáne jaıly qala ortasyn qurý jobalaryna qatysýynyń mańyzdylyǵyn atap ótti. Aıtpaqshy, bul aýla 60 jylǵa jýyq ýaqyt boıy mundaı jóndeý kórmegen.
Sapar barysynda Almaty ákimi seısmologıalyq baqylaý men zertteýdiń ulttyq ǵylymı ortalyǵyna, №14 jańǵyrtylǵan kitaphanaǵa, ınklúzıvti bilim alý úshin barlyq jaǵdaı jasalǵan Almaty tehnologıalar jáne florıstıka kolejine bardy.